13 ವರ್ಷಗಳ ನಂತರ ಕಾಶ್ಮೀರ ಸ್ಥಳೀಯ ಸಂಸ್ಥೆಗಳ ಚುನಾವಣೆ: ಬಂಡಿಪೊರಾದಲ್ಲಿ ಕಲ್ಲೆಸೆತ

ಚಿತ್ರ ಕೃಪೆ: ANI

ಶ್ರೀನಗರ (www.vknews.in) : ಜಮ್ಮು ಕಾಶ್ಮೀರದಲ್ಲಿ ಸ್ಥಳೀಯ ಸಂಸ್ಥೆಗಳಿಗೆ 11 ಜಿಲ್ಲೆಗಳಲ್ಲಿ ಮೊದಲ ಹಂತದ ಚುನಾವಣೆ ನಡೆಯುತ್ತಿದೆ. ಒಟ್ಟು 4 ಹಂತಗಳಲ್ಲಿ ಚುನಾವಣೆ ನಡೆಯಲಿದ್ದು, ಕಾಂಗ್ರೆಸ್ – ಬಿಜೆಪಿ ನಡುವೆ ನೇರ ಹಣಾಹಣಿ ಏರ್ಪಟ್ಟಿದ್ದು, ಪಿಡಿಪಿ ಮತ್ತು ನ್ಯಾಷನಲ್ ಕಾನ್ಫರೆನ್ಸ್ ಪಕ್ಷಗಳು ಚುನಾವಣೆಯನ್ನು ಬಹಿಷ್ಕರಿಸಿವೆ. 13 ವರ್ಷಗಳ ನಂತರ ಸ್ಥಳೀಯ ಸಂಸ್ಥೆಗಳ ಚುನಾವಣೆ ನಡೆಯುತ್ತಿದ್ದು 11 ಗಂಟೆಯ ಹೊತ್ತಿಗೆ ಅನಂತನಾಗ್​ – 5%, ಬುದ್ಗಾಂ -3%, ಬಂಡಿಪೊರಾ – 2%, ಬಾರಾಮುಲ್ಲಾ – 3%, ಜಮ್ಮು- 34%, ಕಾರ್ಗಿಲ್ – 33%, ಕುಪ್ವಾರಾ – 18%, ಲೇಹ್ – 26%, ಪೂಂಛ್ – 47%, ರಾಜೌರಿ – 55%, ಶ್ರೀನಗರದಲ್ಲಿ 3.50%ರಷ್ಟು ಮತದಾನವಾಗಿದೆ.

ರಾಜೌರಿ, ಗೋರಖ್​​ನಗರ್, ಜಮ್ಮು ಜಿಲ್ಲೆಯ ಗಾಂಧಿ ನಗರ್ ಮೊದಲಾದ ಪ್ರದೇಶಗಳಲ್ಲಿ ಜನ ಸರದಿ ಸಾಲಿನಲ್ಲಿ ನಿಂತು ಮತದಾನ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ ದೃಶ್ಯ ಕಂಡು ಬಂತು. ಕಾಶ್ಮೀರ ಕಣಿವೆಯಲ್ಲಿ ನಡೆಯುತ್ತಿರುವ ಚುನಾವಣೆ ವೇಳೆ ಅಹಿತಕರ ಘಟನೆಗಳು ತಡೆಯದಂತೆ ನಿಗಾವಹಿಸಲು 2ಜಿ ಅಂತರ್ಜಾಲ ಸೇವೆಯನ್ನು ಸ್ಥಗಿತಗೊಳಿಸಲಾಗಿದ್ದು, ಚುನಾವಣೆ ನಡೆಯುವ ವಾರ್ಡ್​ಗಳಲ್ಲಿ ಬಿಗಿ ಭದ್ರತೆಗೆ ವ್ಯವಸ್ಥೆ ಕೈಗೊಳ್ಳಲಾಗಿದೆ. ಕೇಂದ್ರ ಸಚಿವ ಜಿತೇಂದ್ರ ಸಿಂಗ್ ಮತ್ತು ವಿಧಾನಸಭೆಯ ಮಾಜಿ ಉಪಾಧ್ಯಕ್ಷ ಕವೀಂದರ್ ಗುಪ್ತಾ ಜಮ್ಮುವಿನಲ್ಲಿ ಮತ ಚಲಾಯಿಸಿದರು.

ಇಂದು ಅನಂತನಾಗ್​ನ 4, ಬುದ್ಗಾಂನ 1, ಬಂಡಪೊರಾದ 16, ಬಾರಾಮುಲ್ಲಾದ 15, ಜಮ್ಮುವಿನ 153, ಕಾರ್ಗಿಲ್​​ನ 13, ಕುಪ್ವಾರಾದ 18, ಲೇಹ್​​ನ 13, ಪೂಂಛ್​ನ 26, ರಾಜೌರಿಯ 59 ಮತ್ತು ಶ್ರೀನಗರದ 3 ವಾರ್ಡ್​​ಗಳಲ್ಲಿ ಚುನಾವನೆ ನಡೆಯುತ್ತಿದೆ. ಒಟ್ಟು 11 ಜಿಲ್ಲೆಗಳ 1,145 ವಾರ್ಡ್​ಗಳ ಪೈಕಿ ಇಂದು 422 ವಾರ್ಡ್​ಗಲ್ಲಿ ಚುನಾವಣೆ ನಡೆಯುತ್ತಿದೆ. ಈ ನಡುವೆ ಬಂಡಿಪೊರಾ ಬೂತ್​ನಲ್ಲಿ ದುಷ್ಕರ್ಮಿಗಳು ಕಲ್ಲು ತೂರಾಟ ನಡೆಸಿದ್ದು, ಬಿಜೆಪಿ ಅಭ್ಯರ್ಥಿ ಗಾಯಗೊಂಡಿದ್ದಾರೆ.

– ಪ್ರದೀಪ್ ಮಾಲ್ಗುಡಿ, ಸುದ್ದಿ ಟಿವಿ