ಬೈರಿಕಟ್ಟೆ,ವಿಟ್ಲ (ವಿಶ್ವಕನ್ನಡಿಗ ನ್ಯೂಸ್): ಬೈರಿಕಟ್ಟೆಯ ಹೊಸಮನೆ ಫೆನ್ಸ್ ಕ್ರೀಡಾಂಗಣದಲ್ಲಿ ಬಿಕೆ ಫೆನ್ಸ್ ಹಾಗು ಗೆಳೆಯರ ಬಳಗ ಬೈರಿಕಟ್ಟೆ ವತಿಯಿಂದ ನಡೆದ ಬೈರಿಕಟ್ಟೆ ಪ್ರೀಮಿಯರ್ ಲೀಗ್ (ಬಿಪಿಎಲ್)-2021 ಸೀಸನ್-1 ನ ಮುಕುಟವನ್ನು ಅಮೋಘ ಆಟದ ಮೂಲಕ ಕಾಡುಮನೆ ಸ್ಟ್ರೈಕರ್ಸ್ ತಮ್ಮದಾಗಿಸಿಕೊಂಡಿತು.ರಿಯಲ್ ಬೈರಿಕಟ್ಟೆಯನ್ಸ್,ಕಟ್ಟೆ ನೈಟ್ ರೈಡರ್ಸ್,ಕಾಡುಮನೆ ಸ್ಟ್ರೈಕರ್ಸ್ ಹಾಗು ಲೆಜಂಡರಿ ದೇಲಂತಬೆಟ್ಟು ಹೀಗೆ ನಿಗದಿತ ನಾಲ್ಕು ತಂಡಗಳ ಪ್ರೀಮಿಯರ್ ಲೀಗ್ ಗೆ ಹರಾಜು ಪ್ರಕ್ರಿಯೆ ಮೂಲಕ ಆಟಗಾರರನ್ನು ಆಯ್ಕೆಗೊಳಿಸಲಾಗಿತ್ತು.ಮೂರು ದಿನಗಳ ಕಾಲ ರಾತ್ರಿ ಹೊನಲು ಬೆಳಕಿನಲ್ಲಿ ನಡೆದ ಲೀಗ್ ಪಂದ್ಯಾಟದಲ್ಲಿ ಲೆಜಂಡರಿ ದೇಲಂತಬೆಟ್ಟು ಹಾಗು ಕಾಡುಮನೆ ಸ್ಟ್ರೈಕರ್ಸ್ ಪೈಪೋಟಿಯ ಅಂಕದೊಂದಿಗೆ ಅಂತಿಮ ಹಣಾಹಣಿಗೆ ಆಯ್ಕೆಯಾಗಿತ್ತು.ಅಂತಿಮ ಪಂದ್ಯದಲ್ಲಿ ಕಾಡುಮನೆ ಸ್ಟ್ರೈಕರ್ಸ್ ತಂಡ ಐದು ಓವರ್ ಗಳಲ್ಲಿ 25 ರನ್ ಗಳ ಗುರಿಯನ್ನು ನೀಡಿತ್ತು.ಗುರಿಯನ್ನು ಬೆನ್ನಟ್ಟಿದ ಲೆಜಂಡರಿ ದೇಲಂತಬೆಟ್ಟು ಕಾಡುಮನೆ ಸ್ಟ್ರೈಕರ್ಸ್ ತಂಡದ ಅಮೋಘ ದಾಳಿಗೆ 19 ರನ್ ಗಳಿಗೆ ತನ್ನ ಎಲ್ಲಾ ವಿಕೆಟ್ ಗಳನ್ನು ಕಳೆದುಕೊಂಡಿತು.ಈ ಮೂಲಕ ಕಾಡುಮನೆ ಸ್ಟ್ರೈಕರ್ಸ್ ಅರ್ಹವಾಗಿ ಬಿಪಿಎಲ್ ಸೀಸನ್-೧ ಚಾಂಪಿಯನ್ ಶಿಪ್ ಅನ್ನು ತನ್ನದಾಗಿಸಿತು.
ಫೆನ್ಸ್ ಕ್ರೀಡಾಂಗಣದ ನಿರ್ಮಾಣದ ರೂವಾರಿ ಫರಾಝ್ ಬೈರಿಕಟ್ಟೆ ಇವರನ್ನು ಬಿಕೆ ಫೆನ್ಸ್ ಹಾಗು ಗೆಳೆಯರ ಬಳಗ ಸನ್ಮಾನ ನಡೆಸಿತು.ಅಂತಿಮ ಪಂದ್ಯದ ಪಂದ್ಯ ಪುರುಷೋತ್ತಮರಾಗಿ ಕಾಡುಮನೆ ಸ್ಟ್ರೈಕರ್ಸ್ ನಾಯಕ ಝಿಯಾದ್ ಕಾಡುಮನೆ ತಮ್ಮದಾಗಿಸಿದರು.ಸರಣಿಯ ಮನೋಹರವಾದ ಸಿಕ್ಸರ್ ಬಾರಿಸಿದ ಗೌರವಕ್ಕೆ ಲೆಜೆಂಡರಿ ದೇಲಂತಬೆಟ್ಟು ನಾಯಕರಾದ ಅನ್ಸಾರ್ ಶೇಖಮಲೆ ಭಾಜನರಾದರು.ಉತ್ತಮ ದಾಂಡಿಗರಾಗಿ ಕಾಡುಮನೆ ಸ್ಟ್ರೈಕರ್ಸ್ ನ ಆರಿಫ್ ಕಾಡುಮನೆ,ಉತ್ತಮ ಬೌಲರ್ ಆಗಿ ಇಮ್ತಿಯಾಝ್ ಬೊಬ್ಬೆಕೇರಿ,ಸರಣೆ ಶ್ರೇಷ್ಟ ಪ್ರಶಸ್ತಿಗೆ ಝಿಯಾದ್ ಕಾಡುಮನೆ ಆಯ್ಕೆಯಾದರು.ಪಂದ್ಯಾವಳಿಯುದ್ದಕ್ಕೂ ತೀರ್ಪುಗಾರಿಕೆ ನೀಡಿದ ಮಹಮ್ಮದ್ ಕಾನತ್ತಡ್ಕ,ವೀಕ್ಷಕ ವಿವರಣೆ ನೀಡಿದ ಚಂದ್ರಶೇಖರ ಮಾಸ್ಟರ್,ಕ್ರೀಡಾಂಗಣದ ನಿರ್ಮಾಣಕ್ಕೆ ಸಹಕಾರ ನೀಡಿದ ಶೇಖರ್ ಕುಡಿಯರಮೂಲೆ ರವರನ್ನು ಸ್ಮರಣಿಕೆ ನೀಡಿ ಗೌರವಿಸಲಾಯಿತು.ವಿಜೇತ ತಂಡಗಳಿಗೆ ಎಸ್.ಆರ್ ಇಂಜಿನಿಯರಿಂಗ್ ಸೌದಿ ಅರೇಬಿಯಾ, ಚಾಂಪಿಯನ್ ಹಾಗು ರನ್ನರ್ಸ್ ತಂಡಗಳಿಗೆ ನಗದು ಬಹುಮಾನವನ್ನು ಘೋಷಿಸಿದರು.
ಸಮಾರೋಪ ಸಮಾರಂಭದ ನಿರೂಪಣೆಯನ್ನು ಆಶಿಕ್ ಮಿಯಾ ಆವಳ ನಡೆಸಿಕೊಟ್ಟರು.ಕಾರ್ಯಕ್ರಮದಲ್ಲಿ ಕನ್ಯಾನ ಗ್ರಾಮ ಪಂಚಾಯತ್ ಸದಸ್ಯರಾದ ಪಿಬಿ ಮೊಯಿದಿನ್,ಮಾಜಿ ಸದಸ್ಯರಾದ ಹಮೀದ್ ಡಿ,ಗೆಳೆಯರ ಬಳಗದ ಅಧ್ಯಕ್ಷರಾದ ಚಂದ್ರಶೇಖರ್ ಮಾಸ್ಟರ್,ಖಜಾಂಜಿ ಮಾರ್ಸಲ್ ಡಿಸೋಜ,ಸಾಮಾಜಿಕ ಕಾರ್ಯಕರ್ತರಾದ ಇಬ್ರಾಹಿಂ ಇಂಬುಚ್ಚ,ಸಿರಾಜ್ ಮದಕ ಮೊದಲಾದವರು ಉಪಸ್ಥಿತರಿದ್ದರು.ಝಡ್ ಮ್ಯಾಕ್ಸ್ ಲೈವ್ ಪಂದ್ಯದ ನೇರ ಪ್ರಸಾರ ನೀಡಿದರು.
ಸಂಪಾದಕರು, ವಿಶ್ವ ಕನ್ನಡಿಗ ನ್ಯೂಸ್
Your email address will not be published. Required fields are marked *
Copyright © 2010 ವಿಶ್ವ ಕನ್ನಡಿಗ ನ್ಯೂಸ್. All Rights Reserved.