ಬುದ್ದಿವಂತ ಜನರು ಮತ್ತು ಬ್ಲೇಡ್ ಕಂಪನಿಗಳು

(www.vknews.in) ; ಮನುಷ್ಯನು ಸುಲಭದಲ್ಲಿ ಮೋಸ ಹೋಗ ಬಹುದಾದ ಒಂದು ವಿಷಯವಿದ್ದರೆ ಅದು ಹಣದ ವಿಷಯದಲ್ಲಿ ಎಂದು ಹೇಳಬಹುದು.

ಎಷ್ಟೇ ಬುದ್ದಿವಂತನಾದರೂ ಮನುಷ್ಯನು ಹಣದ ವಿಷಯದಲ್ಲಿ ಎಡವುತ್ತಾನೆ. ಅದು ಮಾತ್ರವಲ್ಲದೆ ಸುಲಭದಲ್ಲಿ ಇನ್ನೊಬ್ಬನಿಂದ ಮೋಸಕ್ಕೆ ಒಳಗಾಗುತ್ತಾನೆ.

“ಹಣ” ಒಂದು ಮಾಯಾಜಾಲದಂತೆ. ಅದು ಕೈಯಲ್ಲಿ ಇರುವಾಗ ಅದರ ಬೆಲೆ ಗೊತ್ತಾಗುವುದಿಲ್ಲ, ಕಳೆದು ಹೋದ ಮೇಲೆಯೇ ಅದರ ಮೌಲ್ಯ ಮನುಷ್ಯನಿಗೆ ಗೊತ್ತಾಗುತ್ತದೆ.

ಹಣದ ವಿಷಯದಲ್ಲಿ ಹೆಚ್ಚಾಗಿ ಮೋಸ ಹೋಗುವವರು ತೀರ ಬಡವರು ಮತ್ತು ಮಧ್ಯಮ ವರ್ಗದವರೇ ಆಗಿರುತ್ತಾರೆ.
ಶ್ರೀಮಂತರು ಇನ್ನೂ ಹೆಚ್ಚು ಸಂಪಾದಿಸಬೇಕು ಎನ್ನುವ ಅತೀ ಆಸೆಯಿಂದ ಲೋಭಕ್ಕೆ ಒಳಗಾಗಿ ಇದ್ದುದನ್ನು ಕಳೆದು ಕೊಳ್ಳುತ್ತಾರೆ.

ಬಡ-ಮಧ್ಯಮ ವರ್ಗದವರ ಮನೋಭಾವನೆಯನ್ನು ಅರಿತು ಕೊಂಡು ಕೆಲವು ಸಂಸ್ಥೆಗಳು “ನಿಮ್ಮ ಹಣವನ್ನು ಕೆಲವೇ ಸಮಯದಲ್ಲಿ ದ್ವಿಗುಣ ಮಾಡಿ ಕೊಡುತ್ತೇವೆ” ಎಂದು ಮೋಹಕವಾದ ಬಗೆ ಬಗೆಯ ಜಾಹಿರಾತುಗಳಿಂದ ಇಂತವರನ್ನು ಆಕರ್ಷಿಸುತ್ತಾರೆ.
ಬಡ- ಮಧ್ಯಮ ವರ್ಗದವರು ತಾವು ಸಂಪಾದನೆ ಮಾಡಿದ ಸ್ವಲ್ಪ ಹಣವನ್ನು ಮತ್ತು ಅಲ್ಲಿ ಇಲ್ಲಿ ಸಾಲ ಮಾಡಿ ಇವರ ಮೋಸದ ಮಾತಿಗೆ ಬಲಿಯಾಗಿ ತಮ್ಮ ಮಕ್ಕಳ ವಿದ್ಯಾಭ್ಯಾಸ ಮತ್ತು ಹೆಣ್ಣುಮಕ್ಕಳ ಮದುವೆ ಮಾಡಿಸುವ ಅದಮ್ಯ ಆಸೆಯಿಂದ ಇಂತಹ ಸಂಸ್ಥೆಯಲ್ಲಿ ಹಣವನ್ನು ಹೂಡಿಕೆ ಮಾಡುತ್ತಾರೆ.

ಇವರ ಪ್ಲಾನಿಂಗ್ ಹೇಗೆ ಇರುತ್ತದೆ ಅಂದರೆ ಕೆಲವು ತಿಂಗಳುಗಳ ತನಕ ಸ್ವಲ್ಪ ಹಣವನ್ನು ನೀಡಿ ಲಾಭ ಬಂತು ಎಂದು ಹೇಳಿ ಹೂಡಿಕೆದಾರರಿಗೆ ಆಸೆಯನ್ನು ಹುಟ್ಟಿಸುತ್ತಾರೆ. ಬಡ ಮಧ್ಯಮ ವರ್ಗದವರು ತಮಗೆ ಸಿಕ್ಕಿದ ಹಣದಲ್ಲಿ ಸಂತೋಷಗೊಂಡು ತಮ್ಮ ಕುಟುಂಬದವರನ್ನು ಮತ್ತು ಗೆಳೆಯರನ್ನು ಇಂತಹ ಸಂಸ್ಥೆಗಳಿಗೆ ಸೇರಿಸುತ್ತಾರೆ.

ಹಾಗೆಯೇ ಇಂತಹ ಸಂಸ್ಥೆಯ ವ್ಯವಸ್ಥಾಪಕರು ಮತ್ತು ಅಲ್ಲಿ ಕೆಲಸ ಮಾಡುವ ಕೆಲವರು ಗ್ರಾಹಕರಿಗೆ ತಮ್ಮ ಮೇಲೆ ನಂಬಿಕೆ ಬರಲಿ ಎಂಬ ಉದ್ದೇಶದಿಂದ ತಲೆಯಲ್ಲಿ ಟೊಪ್ಪಿ, ಮುಖದಲ್ಲಿ ಗಡ್ಡ, ಹಣೆಯಲ್ಲಿ ದೊಡ್ಡ ನಾಮ, ಹೀಗೆ ತಮ್ಮ ಧಾರ್ಮಿಕ ತೆಯನ್ನು ತೋರಿ ತಾವು ಸಭ್ಯರು ಬಹಳ ಧಾರ್ಮಿಕರು ಎಂದು ಸಮಾಜದಲ್ಲಿ ಬಹಳ ಒಳ್ಳೆಯವರಂತೆ ಪೋಸ್ ಕೊಡುತ್ತಾರೆ.

ಯಾವುದೇ ನಿಜವಾದ ವ್ಯವಹಾರದಲ್ಲಿ ಯಾರು ಕೂಡ ಪುಕ್ಕಟೆಯಾಗಿ ಹಣವನ್ನು ಕೊಡಲಾರರು, ಜನರನ್ನು ಮೋಸ ಮಾಡಬೇಕು ಸುಲಭದಲ್ಲಿ ಹಣಗಳಿಸಿ ಮುಳುಗಬೇಕು ಎನ್ನುವುದೇ ಇಂತಹ 98% ಸಂಸ್ಥೆಗಳ ಉದ್ದೇಶವಾಗಿರುತ್ತದೆ. ಇದನ್ನು ತಿಳಿದೂ ಕೂಡ ಬುದ್ದಿವಂತರಾದ ಜನರು ಇವರ ಮಾತಿನ ಮೋಡಿಗೆ ಮರುಳಾಗಿ ಇವರ ಬಲೆಗೆ ಬೀಳುತ್ತಾರೆ.

ಒಂದು ಸಂಸ್ಥೆಯಲ್ಲಿ ಹಣವನ್ನು ಹೂಡುವಾಗ ಹೆಚ್ಚಿನವರು ತಮಗೆ ಇಂತಿಷ್ಟೇ ಲಾಭ ಬರಬೇಕು ಎಂಬ ಉದ್ದೇಶದಿಂದ ಹಣವನ್ನು ಹೂಡುತ್ತಾರೆ. ಆದರೆ ಇದು ತಪ್ಪು. ಏಕೆಂದರೆ
ವ್ಯಾಪಾರ ಎಂದ ಮೇಲೆ ಲಾಭ ನಷ್ಟ ಸಮಾನವಾಗಿ ಕಂಡು ಹಣವನ್ನು ಹಾಕಬೇಕಾಗುತ್ತದೆ.
ನಮಗೆ ಇಂತಿಷ್ಟೇ ಲಾಭ ಬರಬೇಕು ನಮಗೆ ನಷ್ಟ ಬರಬಾರದು ಎಂದು ಒಂದು ಸಂಸ್ಥೆಯಲ್ಲಿ ಹಣವನ್ನು ಹೂಡಿಕೆಯನ್ನು ಮಾಡಿದರೆ ಅದು ಬಡ್ಡಿಯ ವ್ಯಾಪಾರವಾಗಿ ಮಾರ್ಪಡುತ್ತದೆ. ಅದು ಇಸ್ಲಾಂ ಧರ್ಮದಲ್ಲಿ ನಿಷಿದ್ಧವೂ (ಹರಾಂ) ಆಗಿದೆ. ಇದರ ಬಗ್ಗೆ ಎಷ್ಟೇ ಮಾಹಿತಿ ನೀಡಿದರೂ ಜನರಿಗೆ ಬುದ್ದಿ ಬರುವುದಿಲ್ಲ.
ಆದುದರಿಂದ ತಮ್ಮ ಹಣವನ್ನು ತಮ್ಮ ಮಕ್ಕಳ ಭವಿಷ್ಯಕ್ಕೆ ಬೇಕಾಗಿ ಇಂತಹ ಬ್ಲೇಡ್ ಕಂಪನಿಯಲ್ಲಿ ಹಾಕುವ ಮುಂಚೆ ನೂರು ಬಾರಿ ಯೋಚಿಸುವುದು ಒಳಿತು.

ಹಣವನ್ನು ಒಬ್ಬರ ಕೈಯಲ್ಲಿ ಕೊಟ್ಟು ಅವರಿಂದ ಲಾಭ ಪಡೆಯುವುದಕ್ಕಿಂತ ಸ್ವಂತ ಯಾವುದಾದರು ವ್ಯಾಪಾರ ಮಾಡುವುದಾಗಿದೆ ಉತ್ತಮ. ಹಾಗೆಯೇ ಇನ್ನೊಬ್ಬರ ಕೈಯಿಂದ ಹಣವನ್ನು ಪಡೆದು ನಿನಗೆ ಲಾಭ ಮಾಡಿಕೊಡುತ್ತೇನೆ ಎಂದು ಹೇಳಿ ರಿಸ್ಕ್ ನಂತಹ ವಿಷಯಕ್ಕೆ ಕೈ ಹಾಕಿದರೆ ಈಗಿನ ಮಾರುಕಟ್ಟೆಯಲ್ಲಿ ಅದೃಷ್ಟ ಕೈಹಿಡಿಯದಿದ್ದರೆ ಕೆಲವು ಸಮಯದಲ್ಲಿ ನಷ್ಟದ ಜೊತೆಗೆ ಸಾಲದಲ್ಲಿ ಮುಳುಗಬಹುದು. ಆದರಿಂದ ವ್ಯಾಪಾರದ ವಿಷಯದಲ್ಲಿ ತಿಳಿದವರಿಂದ ಸಲಹೆಯನ್ನು ಪಡೆಯುವುದು ಉತ್ತಮ.

ಏನೇ ಆದರೂ ಮನುಷ್ಯನ ವೇಷಭೂಷಣ ನೋಡಿ ಅವರ ಬಣ್ಣದ ಮಾತುಗಳನ್ನು ಕೇಳಿ ಹಣವನ್ನು ಕೊಡುವ ಮತ್ತು ಹೂಡಿಕೆ ಮಾಡುವ ಕಾಲದಲ್ಲಿ ನಾವು ಇಲ್ಲ ಎಂಬುವುದನ್ನು ನಾವೆಲ್ಲರೂ ಯೋಚಿಸಿದರೆ ಬಹಳ ಉತ್ತಮ. ಕಳೆದು ಹೋದ ಸಮಯಕ್ಕೆ ಚಿಂತಿಸಿ ಫಲವಿಲ್ಲ. ಕಷ್ಟ ಪಟ್ಟು ಸಂಪಾದಿಸಿದ ಹಣದ ಬಗ್ಗೆ ಎಚ್ಚರವಿರಲಿ ಎಂಬುದೇ ಈ ಬರಹದ ಉದ್ದೇಶ.

– ಅಕ್ಬರ್_ಅಲಿ_ಬಜ್ಪೆ