ಶರದ್ ಪವಾರ್ ಮತ್ತು ಅಮಿತ್ ಶಾ ತೋಡಿದ ಖೆಡ್ಡಾಗೆ ತಾನಾಗೇ ಹೋಗಿ ಬಿದ್ದ ಉದ್ಧವ್ ಠಾಕ್ರೆ

(ವಿಶ್ವ ಕನ್ನಡಿಗ ನ್ಯೂಸ್ ,www.vknews.in): ಅಧಿಕಾರದ ಮಹದಾಸೆಯಿಂದ ಬಿಜೆಪಿ ಜೊತೆಗೆ ಸಂಬಂಧ ಕಡೆದುಕೊಂಡ ಶಿವಸೇನೆ ಇದೀಗ ಅಕ್ಷರಶಃ ಒಂಟಿಯಾಗಿದೆ . ಯಾವಾಗ ತಮ್ಮ ಜೊತೆ ಶಿವಸೇನೆ ಸಂಬಂಧ ಕಡಿದುಕೊಂಡಿತೋ ಅಂದೇ ಅಮಿತ್ ಶಾ ತನ್ನ ನೈಜ ಆಟವನ್ನು ಆರಂಭಿಸಿದ್ದರು . ಇದರ ಜೊತೆಗೆ ಮತ್ತೊಂದು ಕಡೆಯಿಂದ ಎನ್‌ಸಿಪಿ ನಾಯಕ ಶರದ್ ಪವಾರ್ ಕೂಡ ರಾಜಕೀಯ ಚದುರಂಗದಾಟ ಆಡಿದರು . ಅಧಿಕಾರದ ಕನಸು ಕಾಣುತ್ತಿದ್ದ ಶಿವಸೇನೆ ಇವರಿಬ್ಬರು ತೋಡಿದ ಖೆಡ್ಡಾಗೆ ತಾನಾಗೇ ಹೋಗಿ ಬಿದ್ದಿದ್ದು ವಿಪರ್ಯಾಸ .

ಉದ್ಧವ್ ಠಾಕ್ರೆ ಬಿಜೆಪಿ ಜೊತೆ ಸಂಬಂಧ ಕಡಿದುಕೊಂಡಾಗ ಸುಮ್ಮನಾದ ಅಮಿತ್ ಶಾ ಶಿವಸೇನೆಯ ಮುಂದಿನ ನಡೆಗಳನ್ನು ಗಮನಿಸುತ್ತಿದ್ದರು .ಯಾವಾಗ ಸೇನೆ ಕಾಂಗ್ರೆಸ್ ,ಎನ್‌ಸಿಪಿ ಜೊತೆ ಮೈತ್ರಿ ಮಾಡಿ ಸರಕಾರ ರಚಿಸಲು ಮುಂದಾಯಿತು ಆಗ ತತ್ವ ಸಿದ್ದಾಂತ ವನ್ನು ಮುಂದಿಟ್ಟು ಬಿಜೆಪಿ ಸೇನೆ ವಿರುದ್ಧ ವಾಗ್ದಾಳಿ ನಡೆಸಿತು. ಜೊತೆಗೆ ತನ್ನ ಕೈಯಲ್ಲಿದ್ದ ಅಧಿಕಾರವನ್ನು ಬಳಸಿಕೊಂಡಿತು . ಮತ್ತೊಂದು ಕಡೆ ಎನ್‌ಸಿಪಿ ನಾಯಕ ಶರದ್ ಪವಾರ್ ಉದ್ಧವ್ ಠಾಕ್ರೆ ಯನ್ನು ಅತ್ತಿಂದಿತ್ತ ಓಡಿಸುತ್ತಲೇ ಕಾಲಹರಣ ಮಾಡಿದರು .ಬೆಂಬಲ ನೀಡುತ್ತೇವೆ ನೀಡುತ್ತೇವೆ ಎಂದು ಹೇಳುತ್ತಲೇ ಸಲೀಸಾಗಿ ಕಾಲಹರಣ ಮಾಡಿ ಸೇನೆಯನ್ನು ಸಂಪೂರ್ಣ ದಿಕ್ಕು ತಪ್ಪಿಸಿದರು . ಮತ್ತೊಂದು ಕಡೆ ಸೇನೆಗೆ ಕಾಲಾವಕಾಶ ನೀಡದೆ ರಾಜ್ಯಪಾಲರು ರಾಷ್ಟ್ರಪತಿ ಆಡಳಿತಕ್ಕೆ ಶಿಫಾರಸ್ಸು ಮಾಡಿದರು .ಇದರಲ್ಲೂ ಎನ್‌ಸಿಪಿ ಯ ರಾಜಭವನಕ್ಕೆ ಬಂದ ಅದೊಂದು ಕರೆ ಕಾರಣ ಎಂದು ಹೇಳಲಾಗುತ್ತಿದೆ . ಒಟ್ಟಿನಲ್ಲಿ ಶಿವಸೇನೆ ತಾನೇ ಮಾಡಿಕೊಂಡ ತಪ್ಪಿನಿಂದ ಇದೀಗ ಒಂಟಿಯಾಗಿದೆ .ಚುನಾವಣೆ ಬಂದರು ಕೂಡ ಅತ್ತ ಕಾಂಗ್ರೆಸ್ ,ಎನ್‌ಸಿಪಿ ಜೊತೆ ಹೋಗಲು ತತ್ತ್ವ ,ಸಿದ್ದಾಂತ ಅಡ್ಡಿ. ಇಲ್ಲಿ ಬಿಜೆಪಿ ಜೊತೆ ಮುನಿಸು, ಮುಂದೇನು ಎಂಬುದು ಕಾದು ನೋಡಬೇಕಷ್ಟೆ .