ಇಸ್ರೋ ಬೇಹುಗಾರಿಕೆ ಪ್ರಕರಣದಲ್ಲಿ ಖುಲಾಸೆಗೊಂಡಿದ್ದ ಫೌಜಿಯಾ ಹಸನ್ ನಿಧನ

ಕೊಲಂಬೊ (ವಿಶ್ವ ಕನ್ನಡಿಗ ನ್ಯೂಸ್) : ವಿವಾದಿತ ಇಸ್ರೋ ಬೇಹುಗಾರಿಕೆ ಪ್ರಕರಣದಲ್ಲಿ ಖುಲಾಸೆಗೊಂಡಿದ್ದ ಮಾಲ್ಡೀವ್ಸ್ ಮಹಿಳೆ ಫೌಜಿಯಾ ಹಸನ್ (80) ನಿಧನರಾಗಿದ್ದಾರೆ. ಶ್ರೀಲಂಕಾದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರು ಮೃತಪಟ್ಟಿದ್ದಾರೆ. ಮಾಲ್ಡೀವ್ಸ್ ವಿದೇಶಾಂಗ ಸಚಿವರು ಫೌಜಿಯಾ ಹಸನ್ ಅವರ ಸಾವನ್ನು ಖಚಿತಪಡಿಸಿದ್ದಾರೆ.

ಫೌಜಿಯಾ ಹಸನ್ ಪ್ರಸಿದ್ಧ ಮಾಲ್ಡೀವಿಯನ್ ಚಲನಚಿತ್ರ ನಟಿ. ಮಾಲ್ಡೀವ್ಸ್‌ನಲ್ಲಿ ರಾಷ್ಟ್ರೀಯ ಚಲನಚಿತ್ರ ಸೆನ್ಸಾರ್ ಮಂಡಳಿಯಲ್ಲಿ ಅಧಿಕಾರಿಯಾಗಿದ್ದ ಫೌಜಿಯಾ ಹಸನ್ ಇಸ್ರೋ ರಹಸ್ಯಗಳನ್ನು ಸೋರಿಕೆ ಮಾಡಿದ ಪ್ರಕರಣದಲ್ಲಿ ಎರಡನೇ ಆರೋಪಿಯಾಗಿದ್ದರು. ಮೊದಲ ಆರೋಪಿಗಳಾದ ಮಾಲೆ ಮೂಲದ ಮರ್ಯಮ್ ರಶೀದಾ ಮತ್ತು ಫೌಜಿಯಾ ಹಸನ್ ಅವರು ಇಸ್ರೋ ಬೇಹುಗಾರಿಕೆ ಪ್ರಕರಣದಲ್ಲಿ ನವೆಂಬರ್ 1994 ರಿಂದ ಡಿಸೆಂಬರ್ 1994 ರವರೆಗೆ ಕೇರಳದಲ್ಲಿ ಜೈಲು ಶಿಕ್ಷೆ ಅನುಭವಿಸಿದ್ದರು. ನಂತರ ಇಬ್ಬರನ್ನೂ ದೋಷಮುಕ್ತಗೊಳಿಸಲಾಯಿತು.

ಫೌಜಿಯಾ ಜನವರಿ 8, 1942 ರಂದು ಜನಿಸಿದರು. ಅವರು ಮಾಲಿ ಅಮಿನಿಯಾ ಶಾಲೆ ಮತ್ತು ಕೊಲಂಬೊ ಪಾಲಿಟೆಕ್ನಿಕ್ (ಶ್ರೀಲಂಕಾ) ನಲ್ಲಿ ಶಿಕ್ಷಣ ಪಡೆದರು. ಅವರು 1957 ರಲ್ಲಿ ಮಾಲ್ಡೀವ್ಸ್ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದಲ್ಲಿ ಗುಮಾಸ್ತರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. 1998 ರಿಂದ 2008 ರವರೆಗೆ, ಅವರು ಮಾಲ್ಡೀವ್ಸ್‌ನ ರಾಷ್ಟ್ರೀಯ ಚಲನಚಿತ್ರ ಸೆನ್ಸಾರ್ ಮಂಡಳಿಯಲ್ಲಿ ಸೆನ್ಸಾರ್ ಅಧಿಕಾರಿಯಾಗಿದ್ದರು. ಅವರು ಸುಮಾರು 100 ಚಿತ್ರಗಳಲ್ಲಿ ನಟಿಸಿದ್ದಾರೆ.