ವೇಗವಾಗಿ ಬರುತ್ತಿರುವ ರೈಲಿನ ಮುಂದೆ ಇನ್‌ಸ್ಟಾಗ್ರಾಮ್ ರೀಲ್ ತೆಗೆಯಲು ಹೋದ ಯುವಕನಿಗೆ ರೈಲು ಡಿಕ್ಕಿ ; ಸಾಮಾಜಿಕ ಜಾಲತಾಣಗಳಲ್ಲಿ ವೀಡಿಯೊ ವೈರಲ್..

(ವಿಶ್ವ ಕನ್ನಡಿಗ ನ್ಯೂಸ್) : ಸಾಹಸಮಯ ವೀಡಿಯೋಗಳನ್ನು ತೆಗೆದು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿ ಗಮನ ಸೆಳೆಯುವ ಮೂಲಕ ಅಪಾಯಕ್ಕೆ ಸಿಲುಕುವ ಅನೇಕ ಕಥೆಗಳನ್ನು ನಾವು ನೋಡಿದ್ದೇವೆ. ಎಷ್ಟು ನೋಡಿದರೂ ಕಲಿಯುವುದಿಲ್ಲ ಎಂಬಂತೆ ವಿಪರೀತ ಸಾಹಸಕ್ಕೆ ಕೈ ಹಾಕುವವರಲ್ಲಿ ಹಲವರು ಅಪಾಯಕ್ಕೆ ಸಿಲುಕುತ್ತಾರೆ. ಹೀಗೊಂದು ಸುದ್ದಿ ತೆಲಂಗಾಣದಿಂದ ಹೊರಬಂದಿದೆ. ರೈಲ್ವೇ ಹಳಿಯಲ್ಲಿ ನಡೆದುಕೊಂಡು ಹೋಗುತ್ತಿದ್ದ 17ರ ಹರೆಯದ ಬಾಲಕ ಇನ್‌ಸ್ಟಾಗ್ರಾಮ್ ರೀಲ್ ತೆಗೆಯಲು ಯತ್ನಿಸಿ ರೈಲು ಡಿಕ್ಕಿ ಹೊಡೆದಿದೆ.

ತೆಲಂಗಾಣದ ಕಾಸಿಪೇಟ್‌ನಲ್ಲಿ, 17 ವರ್ಷದ ಅಕ್ಷಯ್ ರಾಜ್ ತನ್ನ ಸ್ನೇಹಿತರೊಂದಿಗೆ ರೀಲ್‌ಗಳನ್ನು ಶೂಟ್ ಮಾಡಲು ರೈಲು ಮತ್ತು ರೈಲ್ವೆ ಹಳಿಯನ್ನು ಆರಿಸಿಕೊಂಡನು. ಅತಿವೇಗದಲ್ಲಿ ರೈಲು ಬರುತ್ತಿದ್ದಾಗ ಅದರ ಮುಂದೆ ಸಾಗುತ್ತಿರುವುದನ್ನು ವಿಡಿಯೋ ಮಾಡಲು ಯತ್ನಿಸಿದ್ದಾನೆ. ಆದರೆ ವೇಗವಾಗಿ ಬಂದ ರೈಲು ಡಿಕ್ಕಿ ಹೊಡೆದಿದೆ. ಬಳಿಕ ಜೊತೆಗಿದ್ದ ಸ್ನೇಹಿತರು ಈ ವಿಡಿಯೋವನ್ನು ಬಿಡುಗಡೆ ಮಾಡಿದ್ದಾರೆ.

ಅಪಘಾತದಲ್ಲಿ ಅಕ್ಷಯ್ ರಾಜ್ ಗಂಭೀರವಾಗಿ ಗಾಯಗೊಂಡಿದ್ದು, ಕೂಡಲೇ ರೈಲ್ವೆ ಪೊಲೀಸರು ಅವರನ್ನು ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಬಳಿಕ ಸಂಬಂಧಿಕರು ಖಾಸಗಿ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಅಕ್ಷಯ್ ರಾಜ್ ಅಪಾಯದಿಂದ ಪಾರಾಗಿದ್ದು, ಆಸ್ಪತ್ರೆಯಲ್ಲಿ ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ. ಅವರ ಕಾಲಿಗೆ ಮತ್ತು ಮುಖಕ್ಕೆ ಅನೇಕ ಗಾಯಗಳಾಗಿವೆ.

ಘಟನೆ ನಡೆದಾಗ ಹಳಿಯಲ್ಲಿ ಕೆಲಸ ಮಾಡುತ್ತಿದ್ದ ರೈಲ್ವೇ ನೌಕರರು ಅಕ್ಷಯ್ ರೈಲು ಬಂದಾಗ ಹಳಿ ಬಳಿ ನಡೆದುಕೊಂಡು ಹೋಗುತ್ತಿದ್ದರು ಎಂದು ಹೇಳಿದ್ದಾರೆ. ರೈಲು ಬರುತ್ತಿದೆ ಎಂದು ಎಚ್ಚರಿಸಿದರೂ ಅಕ್ಷಯ್ ಗಮನಹರಿಸಲಿಲ್ಲ ಎಂದು ಅವರು ಹೇಳಿದ್ದಾರೆ. ಘಟನೆ ಸಂಬಂಧ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ ಎಂದು ರೈಲ್ವೆ ಪೊಲೀಸರು ತಿಳಿಸಿದ್ದಾರೆ.

ಘಟನೆಯ ವಿಡಿಯೋ ಕೆಳಗೆ ನೀಡಲಾಗಿದೆ, ವೀಡಿಯೊ ಆಘಾತಕಾರಿ ದೃಶ್ಯಗಳನ್ನು ಹೊಂದಿದೆ ಎಂಬುದನ್ನು ದಯವಿಟ್ಟು ಗಮನಿಸಿ..

https://twitter.com/KP_Aashish/status/1566630987273867266