ಏಷ್ಯಾಕಪ್ ಮಹಿಳಾ ಟಿ20 ಕ್ರಿಕೆಟ್ ಪ್ರಶಸ್ತಿ ಗೆದ್ದ ಭಾರತ – ಇದು ಭಾರತ ಮಹಿಳಾ ತಂಡದ ಏಳನೇ ಏಷ್ಯಾ ಕಪ್ ಪ್ರಶಸ್ತಿ..

(ವಿಶ್ವ ಕನ್ನಡಿಗ ನ್ಯೂಸ್) : 2022 ರ ಏಷ್ಯಾ ಕಪ್ ಮಹಿಳಾ ಟಿ 20 ಕ್ರಿಕೆಟ್ ಪ್ರಶಸ್ತಿಯನ್ನು ಭಾರತ ಗೆದ್ದುಕೊಂಡಿತು. ಭಾರತೀಯ ಮಹಿಳಾ ತಂಡವು ಫೈನಲ್ ನಲ್ಲಿ ಶ್ರೀಲಂಕಾವನ್ನು ಎಂಟು ವಿಕೆಟ್ ಗಳಿಂದ ಸೋಲಿಸಿ ಪ್ರಶಸ್ತಿಯನ್ನು ಗೆದ್ದುಕೊಂಡಿತು. ಶ್ರೀಲಂಕಾ ನೀಡಿದ್ದ 66 ರನ್ ಗಳ ಗುರಿ ಬೆನ್ನಟ್ಟಿದ ಭಾರತ 8.3 ಓವರ್ ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ ಗುರಿ ತಲುಪಿತು. ಇದು ಭಾರತ ಮಹಿಳಾ ತಂಡದ ಏಳನೇ ಏಷ್ಯಾ ಕಪ್ ಪ್ರಶಸ್ತಿಯಾಗಿದೆ.

ಆರಂಭಿಕ ಆಟಗಾರ್ತಿ ಸ್ಮೃತಿ ಮಂಧಾನಾ ಅವರ ಅದ್ಭುತ ಪ್ರದರ್ಶನವು ಭಾರತಕ್ಕೆ ಪಂದ್ಯವನ್ನು ಗೆಲ್ಲಲು ಸುಲಭಗೊಳಿಸಿತು. ಶಫಾಲಿ ವರ್ಮಾ ಅವರನ್ನು ಇನೋಕಾ ರಣವೀರಾ ಔಟ್ ಮಾಡಿದರು, ಶಫಾಲಿ ಕೇವಲ ಐದು ರನ್ ಗಳಿಸಿದರು. ಜೆಮಿಮಾ ರೊಡ್ರಿಗಸ್ (2) ಬೇಗನೆ ಗ್ಯಾಲರಿಗೆ ಬಂದಾಗ ಭಾರತದ ಭರವಸೆಗಳು ನುಚ್ಚುನೂರಾಗಿದ್ದವು. ಮತ್ತೊಂದೆಡೆ ಮಂಧಾನಾ, ಹರ್ಮನ್ಪ್ರೀತ್ ಕೌರ್ (ಔಟಾಗದೆ 11) ಅವರೊಂದಿಗೆ ಸೇರಿಕೊಂಡು ಭಾರತವನ್ನು ತ್ವರಿತವಾಗಿ ಗೆಲುವಿನತ್ತ ಕೊಂಡೊಯ್ದರು. ಸ್ಮೃತಿ ಮಂಧಾನಾ 25 ಎಸೆತಗಳಲ್ಲಿ 51 ರನ್ ಗಳಿಸಿದರು.

ಮೊದಲು ಬ್ಯಾಟ್ ಮಾಡಿದ ಶ್ರೀಲಂಕಾ ನಿಗದಿತ 20 ಓವರ್ ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 65 ರನ್ ಗಳಿಸಿತು. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಶ್ರೀಲಂಕಾ ಮೊದಲ 9 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು.