ಪರಿಸರ ಪ್ರೇಮಿ ಹಕೀಮ್ ಸಾಬ್..

(www.vknews.in) : ಮರಗಳು ಪ್ರಾಣಿ ಪಕ್ಷಿಗ.ಳಿಗೆ ಆಶ್ರಯ ಮತ್ತು ಆಹಾರವನ್ನು ಒದಗಿಸುತ್ತವೆ. ಕಡು ಬಿಸಿಲಿನಲ್ಲಿ ಎಲ್ಲರು ಆಶ್ರಯ ಪಡೆಯಲು ಹುಡುಕುವುದು ಮರಗಳ ನೆರಳನ್ನೇ. ನಮ್ಮ ವಾಹನಗಳನ್ನು ಸಹ ನೆರಳಲ್ಲಿ ನಿಲ್ಲಿಸಲು ನೆರಳು ಹುಡುಕುತ್ತೇವೆ.  ಮರಗಳು ನೆರಳು ಕೊಡುವುದಲ್ಲದೆ ಮಾಲಿನ್ಯದ ಗಾಳಿಯನ್ನು ಶುದ್ಧೀಕರಿಸು ತ್ತವೆ ಮತ್ತು ಪರಿಸರದ ತಾಪಮಾನವನ್ನು ನಿಯಂತ್ರಿಸುವಲ್ಲಿ ಸಹಾಯಕರವಾಗಿವೆ. ಮರಗಳು ಮಾನವ ಜೀವನದ ಗುಣಮಟ್ಟದಲ್ಲಿ ಮತ್ತು ಯೋಗಕ್ಷೇಮದಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತಿವೆ.

ಮರಗಳನ್ನು ನೆಡುವುದು ನಮ್ಮ ಜವಾಬ್ದಾರಿಯಲ್ಲ ಎಂದು ಕೆಲವರು ಮರಗಳ ಪ್ರಾಮುಖ್ಯತೆಯ ವಿರುದ್ಧ ವಾದಿಸುತ್ತಾರೆ, ಆದರೆ ನಾವು ನಿಜವಾಗಿಯೂ ಮರಗಳ ಸಂಪೂರ್ಣ ಸಾಮರ್ಥ್ಯವನ್ನು ಮತ್ತು  ಅವುಗಳು ಒದಗಿಸುವ ಸೇವೆಗಳ ಆರ್ಥಿಕ ಮೌಲ್ಯವನ್ನು ಪರಿಗಣಿಸಿದ್ದೇವೆಯೇ? ಹವಾಮಾನದ ಹರಿವನ್ನು ನಿರ್ವಹಿಸುವಲ್ಲಿ, ಗಾಳಿಯ ಗುಣಮಟ್ಟವನ್ನು ನಿಯಂತ್ರಿಸುವಲ್ಲಿ, ಮತ್ತು ಇಂಗಾಲವನ್ನು ಬೇರ್ಪಡಿಸುವಲ್ಲಿ ಮರಗಳು ಪ್ರಮುಖ ಪಾತ್ರವಹಿಸುತ್ತವೆ. ಒಂದು ಆಕ್ಸಿಜನ್ ಸಿಲಿಂಡರ್ ಬೆಲೆ ಮತ್ತು ಮಹತ್ವ ಕರೋನ ಮಹಾಮಾರಿ ಕಾಲದಲ್ಲಿ ನಮಗೆಲ್ಲರಿಗೂ ಗೊತ್ತಾಯಿತು. ಒಂದು ದೊಡ್ಡ ಮರವು ನಾಲ್ಕು ಜನರಿಗೆ ಒಂದು ದಿನದ ಆಮ್ಲಜನಕವನ್ನು ಒದಗಿಸುತ್ತದೆ ಎಂದು ಪ್ರಸ್ತಾಪಿಸಲಾಗಿದೆ. ಪ್ರಕೃತಿಯ ಅನುದಾನಗಳಿಗೆ ನಾವು ಬೆಲೆ ಕಟ್ಟಲು ಸಾಧ್ಯವೇ. ನಾವು ಪ್ರಕೃತಿಯೊಂದಿಗೆ ಸಮತೋಲನ ಕಾಪಾಡಿಕೊಳ್ಳದೆ ಹೋದರೆ ಮುಂದಿನ ದಿನಗಳಲ್ಲಿ ಅದರ ಕೋಪಕ್ಕೆ ಬಲಿಯಾಗಬೇಕಾಗುತ್ತದೆ.

Advertisements

ಮರಗಳ ಬಗ್ಗೆ ಇಂದು ಬರೆಯಲು ಒಂದು ಕಾರಣವಿದೆ. ಬನಶಂಕರಿ ತರಕಾರಿ ಮಾರುಕಟ್ಟೆಯಿಂದ ಹಿಡಿದು ವಸಂತಪುರದ ಕಡೆಗೆ ಕಾವೇರಿ ನೀರಿನ ಪೈಪ್ ಲೈನ್ ಹಾದು ಹೋಗಿದೆ. ಒಂದು ಕಾಲದಲ್ಲಿ ಅದು ಪಾಳು ಬಿದ್ದಿದ್ದ ರಸ್ತೆಯಾಗಿತ್ತು. ಜನರು ಒಂಟಿಯಾಗಿ ಓಡಾಡಲು ಸಹ ಹೆದರುತ್ತಿದ್ದರು. ಇಂದು ಕಾವೇರಿ ನೀರು ಸರಬರಾಜು ಪೈಪುಗಳ ಮೇಲೆ ಮಣ್ಣು ಹಾಯಿಸಿ ಅದರ ಮೇಲೆ ಸುಂದರವಾದ ಉದ್ಯಾನವನಗಳನ್ನು ಮಾಡಲಾಗಿದೆ. ಪೈಪ್ ಲೇನ್ ಪಕ್ಕದ ರಸ್ತೆಯನ್ನು ಸಹ ಡಾಂಬರೀಕರಣ ಮಾಡಿ ಜನರು ಸುಗಮವಾಗಿ ಓಡಾಡುವಂತೆ ಮತ್ತು ವಾಹನಗಳು ಸಂಚರಿಸುವಂತೆ ಮಾಡಲಾಗಿದೆ. ಆದರೆ ಜನರು ರಸ್ತೆಯ ಸುಂದರತೆಯನ್ನು ಕಾಪಾಡುಕೊಳ್ಳುವಲ್ಲಿ ವಿಫಲರಾಗುತ್ತಿದ್ದಾರೆ.

ದಾರಿಯುದ್ದಕ್ಕೂ ಕಸದ ಗುಡ್ಡಗಳು ಕಾಣ ಸಿಗುತ್ತವೆ. ಜನರು ಸಾಮೂಹಿಕ ಜವಾಬ್ದಾರಿ ಮರೆತರೆ ಅನೇಕ ಸಂಕಷ್ಟಗಳಿಗೆ ತಿಳಿದೋ ತಿಳಿಯದೆಯೋ ಬಲಿಯಾಗಬೇಕಾಗುತ್ತದೆ. ಇದೇ ಪೈಪ್ ಲೇನ್ ರಸ್ತೆಯಲ್ಲಿ ನನಗೆ ಓರ್ವ ಜವಾಬ್ದಾರಿಯುತ ವ್ಯಕ್ತಿಯ ಜೊತೆ ಮಾತನಾಡುವ ಅವಕಾಶ ಸಿಕ್ಕಿತು. ಅವರ ಹೆಸರು ಮುನವರ್. ಜನರು ಅವರನ್ನು ಹಕೀಮ ಸಾಬ್ ಎಂದೇ ಕರೆಯುವುದು. ಏಕೆಂದರೆ ಅವರು ನಾಟಿ ಔಷಧಿಗಳನ್ನು ಮಾಡುತ್ತಾರೆ. ಮೂಲತಃ ಅವರು ಕನಕಪುರದ ಕೋಡಿಹಳ್ಳಿಯವರು. ಬೆಂಗಳೂರಿಗೆ ಬಂದು ನೆಲಸಿ ಸುಮಾರು ವರ್ಷಗಳಾಗಿವೆ. ಅವರ ತಂದೆಯವರು ಅರಣ್ಯ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದರು. ಹಕೀಮ್ ಸಾಬ್ ಚಿಕ್ಕಂದಿನಿಂದಲೂ ಪರಿಸರ ಪ್ರೇಮಿಯಾಗಲು ಅವರ ತಂದೆಯವರೇ ಕಾರಣ.

ಮುದಿವಯಸ್ಸಿನಲ್ಲೂ ಆ ಪ್ರೇಮ ಕಡಿಮೆಯಾಗಿಲ್ಲ. ಸಾವಿರಾರು ಮರಗಳನ್ನು ನೆಟ್ಟಿ ಪರಿಸರವನ್ನು ಕಾಪಾಡಲು ಪ್ರಯತ್ನಿಸಿದ್ದಾರೆ. ಪೈಪ್ ಲೇನ್ ರಸ್ತೆಯಲ್ಲಿ ಸುಮಾರು ೧೦೦ ಮರಗಳನ್ನು ಮಕ್ಕಳಂತೆ ಪೋಷಿಸಿ ಎತ್ತರಕ್ಕೆ ಬೆಳೆಯುವಂತೆ ಮಾಡಿದ್ದಾರೆ. ಜನರು ಮತ್ತು ಜಾನುವಾರುಗಳು ಅದರ ಲಾಭವನ್ನು ಪಡೆಯುತ್ತಿದ್ದಾರೆ. ಪ್ರತಿದಿನ ಬೆಳಕು ಹರಿದರೆ ಸಾಕು ಗಿಡಮರಗಳನ್ನು ನೆಡುವುದು, ರಕ್ಷಿಸುವುದು ಮತ್ತು ಬೆಳೆಸುವುದೇ ಅವರ ಕೆಲಸ.  ನಾನು ಅವರಿಗೆ ಪ್ರಶ್ನಿಸಿದೆ- ಇದೆಲ್ಲ ಏತಕ್ಕೆ ಮಾಡುತ್ತಿದ್ದೀರಾ ? ಅವರ ಉತ್ತರ ಅದ್ಭುತವಾಗಿತ್ತು. ನಾವು ಇವತ್ತು ಇರುತ್ತೇವೆ ನಾಳೆ ಸತ್ತು ಹೋಗುತ್ತೇವೆ. ಏನಾದರು ಒಂದು ಸಮಾಜಕ್ಕೆ ಕೊಟ್ಟು ಹೋಗಬೇಕು. ಜನರಿಂದ ಏನೂ ಪ್ರತಿಫಲ ಬಯಸಬಾರದು. ದೇವರಿದ್ದಾನೆ.

ಅಲ್ಲಿ ನೋಡಿ, ನಾಯಿಗಳು ನೀರು ಕುಡಿಯಲು ವ್ಯವಸ್ಥೆ ಮಾಡಿದ್ದೇನೆ ಎಂದು ಕೈ ಸನ್ನೆ ಮಾಡಿ ತೋರಿಸಿದರು. ಮರಗಳ ಕೆಳಗೆ ರಸ್ತೆಯ ಬದಿಯಲ್ಲಿ ಪ್ಲಾಸ್ಟಿಕ್ ಡ್ರಮ್ ಗಳನ್ನು ಹೂತು,ದೂರದಿಂದ ನೀರು ತಂದು ಅದರಲ್ಲಿ ಪ್ರತಿದಿನ ಹಾಕಿ, ನಾಯಿಗಳು ಮತ್ತು ಇತರೆ ಜಾನುವಾರುಗಳು ನೀರು ಕುಡಿದುಕೊಂಡು ಹೋಗುವಂತೆ ವ್ಯವಸ್ಥೆ ಮಾಡಿದ್ದಾರೆ. ಈ ಕಾಲದಲ್ಲೂ ಇಂತಹ ಸಾಮೂಹಿಕ ಜವಾಬ್ದಾರಿಯನ್ನು ನಿಭಾಯಿಸುತ್ತಿರುವ ಜನರಿದ್ದಾರಲ್ಲಪ್ಪಾ ಎಂದು ಮನಸಲ್ಲೇ ಅವರ ಕೆಲಸಕ್ಕೆ ಸಲಾಮು ಹೇಳಿದೆ. ಬನಶಂಕರಿ ಪೈಪ್ ಲೇನ್ ಒಂದೇ ಅಲ್ಲ, ಬಹಳ ಕಡೆ ಹಸುಗಳಿಗೆ ನೀರು ಕುಡಿಯುವ ವ್ಯವಸ್ಥೆ ಮಾಡಿದ್ದೇನೆ ಎಂದರು. ಅದರ ಫೋಟೋಗಳು ಇದ್ದರೆ ತೋರಿಸಿ ಎಂದೆ. ಅವರು ಮೊಬೈಲ್ ತೆಗೆದು ತೋರಿಸಿದರು. ಆಶ್ಚರ್ಯವಾಯಿತು. ಫೋಟೋಗಳನ್ನು ಕಳುಹಿಸಿ ನ್ಯೂಸ್ ಪೇಪರ್ ನಲ್ಲಿ  ಹಾಕಿಸುತ್ತೇನೆ ಎಂದೆ. ನನಗೆ ಯಾರ ಪ್ರಶಂಸೆಯ ಹಂಗೂ ಇಲ್ಲ ಎಂದು ಹೇಳಿ ಜಾರಿಕೊಂಡರು.

ಮರಗಳ ಮತ್ತು ಸಸ್ಯಗಳ ಪ್ರಾಮುಖ್ಯತೆಯನ್ನು ಕುರಿತು ಪ್ರವಾದಿ ಮುಹಮ್ಮದ್ (ಸ) ರಿಂದ ಹಲವಾರು ಮಾತುಗಳಿವೆ. 1.ಮರಗಳನ್ನು ನೆಡುವುದನ್ನು ದಾನ ಎಂದು ಪರಿಗಣಿಸಲಾಗುತ್ತದೆ ಮತ್ತು ನೆಟ್ಟವನು ಅದರಿಂದ ಪ್ರಯೋಜನ ಪಡೆಯುವ ಎಲ್ಲರಿಂದ ಆಶೀರ್ವಾದವನ್ನು ಪಡೆಯುತ್ತಾನೆ. 2. ಮರಗಳನ್ನು ಗೌರವದಿಂದ ಪರಿಗಣಿಸಬೇಕು ಮತ್ತು ಅನಗತ್ಯವಾಗಿ ಹಾನಿ ಮಾಡಬಾರದು. 3. ಯಾರು ಮರವನ್ನು ನೆಡುತ್ತಾರೋ ಅವರಿಗೆ ಅಲ್ಲಾಹನು ಆ ಮರದಲ್ಲಿ ಬೆಳೆದ ಉತ್ಪನ್ನದಷ್ಟೇ ಪ್ರತಿಫಲವನ್ನು ನೀಡುತ್ತಾನೆ. 4.ಯಾರು ಒಂದು ಮರವನ್ನು ನೆಟ್ಟು ಅದು ಬೆಳೆದು ಫಲವನ್ನು ಕೊಡುವವರೆಗೆ ಅದನ್ನು ಶ್ರದ್ಧೆಯಿಂದ ನೋಡಿಕೊಳ್ಳುತ್ತಾರೋ ಅವರಿಗೆ ಪ್ರತಿಫಲ ದೊರೆಯುತ್ತದೆ.  5.ಪ್ರಳಯ ದಿನದಂದು ನಿಮ್ಮಲ್ಲಿ ಯಾರಾದರೂ ಖರ್ಜೂರದ ಸಸಿಯನ್ನು ಹೊಂದಿದ್ದರೆ – ಸಾಧ್ಯವಾದರೆ ಅದನ್ನು ನೆಡಬೇಕು.

ಪ್ರಳಯ ಎಂದರೆ ಹೇಗಿರುತ್ತದೆ ಸ್ವಲ್ಪ ಯೋಚಿಸಿ ನೋಡಿ. ಅಂತಹ ಭಯಾನಕ ಸಮಯದಲ್ಲಿ  ನಮಗೆ ಯಾವ ಚಿಂತೆ ಇರುತ್ತದೆ. ಹೇಗಾದರೂ ಮಾಡಿ ಇದರಿಂದ ಮುಕ್ತಿ ಪಡೆದುಕೊಳ್ಳಬೇಕು   ಎಂದು ಒದ್ದಾಡುತ್ತಿರುತ್ತೇವೆ. ಅಲ್ಲವೇ. ಅಂತಹ ಕ್ಲಿಷ್ಟ ಸಮಯದಲ್ಲಿ ಯಾರಾದರೂ ಗಿಡ ನೆಡಲು ಹೋಗುತ್ತಾರೆಯೇ. ಗಿಡಮರಗಳನ್ನು ನೆಡುವುದರ ಮಹತ್ವವನ್ನು ಜನರಿಗೆ ತಿಳಿಸುವುದು ಇಲ್ಲಿನ ಉದ್ದೇಶವಾಗಿದೆ.

ನನ್ನದು ನಿಮ್ಮಲ್ಲಿ ಇಷ್ಟೇ ವಿನಂತಿ ನಿಮ್ಮ ಸುತ್ತಮುತ್ತಲ ಹಸಿರು ಗಿಡಮರಗಳನ್ನು ಕಡಿಯಬೇಡಿ. ಆದಷ್ಟು ಪರಿಸರವನ್ನು ಸಂರಕ್ಷಿಸುವಲ್ಲಿ ಸಹಾಯ ಮಾಡಿ. ಲೋಕಕಲ್ಯಾಣದಲ್ಲಿ ಭಾಗಿಯಾಗಿ.

– ಜಬೀವುಲ್ಲಾ ಖಾನ್