ಕಾಮನ್ವೆಲ್ತ್ ಗೇಮ್ಸ್ : ಭಾರತಕ್ಕೆ 9ನೇ ಚಿನ್ನದ ಪದಕ – ದೀಪಕ್ ಪೂನಿಯಾ, ಸಾಕ್ಷಿ ಮಲಿಕ್, ಭಜರಂಗ್ ಪೂನಿಯಾಗೆ ಚಿನ್ನ, ಅನ್ಶು ಮಲಿಕ್ ಗೆ ಬೆಳ್ಳಿ

ಬರ್ಮಿಂಗ್ಹ್ಯಾಮ್ (ವಿಶ್ವ ಕನ್ನಡಿಗ ನ್ಯೂಸ್) : ಕಾಮನ್ ವೆಲ್ತ್ ಕ್ರೀಡಾಕೂಟದಲ್ಲಿ ಭಾರತೀಯ ಕ್ರೀಡಾಪಟುಗಳು ಇಂದು ಸತತ ಮೂರು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. ಭಾರತದ ಕುಸ್ತಿಪಟುಗಳಾದ ದೀಪಕ್ ಪೂನಿಯಾ, ಸಾಕ್ಷಿ ಮಲಿಕ್ ಮತ್ತು ಬಜರಂಗ್ ಪೂನಿಯಾ ಚಿನ್ನದ ಪದಕ ಗೆದ್ದರು. ಇನ್ನೋರ್ವ ಕುಸ್ತಿಪಟು ಅಂಶು ಮಲಿಕ್ ಕೂಡ ಬೆಳ್ಳಿ ಪದಕಕ್ಕೆ ಗೆದ್ದಿದ್ದಾರೆ. ಕುಸ್ತಿಯಲ್ಲಿ ಭಾರತಕ್ಕೆ ಇನ್ನೂ ಪದಕದ ಭರವಸೆ ಇದೆ. ಕುಸ್ತಿಯಲ್ಲಿ ಇಂದಿನ ಎರಡು ಚಿನ್ನದ ಸ್ಲಾಟ್ ಗಳೊಂದಿಗೆ, ಭಾರತದ ಚಿನ್ನದ ಸಂಖ್ಯೆ ಒಂಬತ್ತಕ್ಕೆ ಏರಿದೆ.

ಪುರುಷರ 86 ಕೆಜಿ ವಿಭಾಗದಲ್ಲಿ ಭಾರತದ ದೀಪಕ್ ಪೂನಿಯಾ ಚಿನ್ನದ ಪದಕ ಗೆದ್ದರು. ದೀಪಕ್ ಪಾಕಿಸ್ತಾನದ ಮೊಹಮ್ಮದ್ ಇನಾಮ್ ಅವರನ್ನು ಸೋಲಿಸಿ ಚಿನ್ನದ ಪದಕ ಗೆದ್ದರು. ಮಹಿಳೆಯರ 62 ಕೆಜಿ ವಿಭಾಗದಲ್ಲಿ ಸಾಕ್ಷಿ ಮಲಿಕ್ ಕೆನಡಾದ ಅನಾ ಗೊಡಿನಸ್ ಗೊನ್ಸಾಲೆಜ್ ಅವರನ್ನು ಸೋಲಿಸಿ ಚಿನ್ನದ ಪದಕ ಗೆದ್ದರು. ಪುರುಷರ 65 ಕೆಜಿ ವಿಭಾಗದಲ್ಲಿ ಬಜರಂಗ್ ಪೂನಿಯಾ ಚಿನ್ನದ ಪದಕ ಗೆದ್ದರು. ಫೈನಲ್ನಲ್ಲಿ ಬಜರಂಗ್ ಕೆನಡಾದ ಲ್ಯಾಕ್ಲಾನ್ ಮೆಕ್ನೀಲೆನ್ ಅವರನ್ನು ಸೋಲಿಸಿ ಚಿನ್ನದ ಪದಕ ಗೆದ್ದರು. ಇದು ಪೂನಿಯಾ ಅವರ ಎರಡನೇ ಕಾಮನ್ ವೆಲ್ತ್ ಚಿನ್ನವಾಗಿದೆ.

ಏತನ್ಮಧ್ಯೆ, ಭಾರತದ ಅನ್ಶು ಮಲಿಕ್ 57 ಕೆಜಿ ಫ್ರೀಸ್ಟೈಲ್ನಲ್ಲಿ ಬೆಳ್ಳಿ ಪದಕಕ್ಕೆ ತೃಪ್ತಿಪಡಬೇಕಾಯಿತು. ಫೈನಲ್ ನಲ್ಲಿ ಅನ್ಶು ನೈಜೀರಿಯಾದ ಒಡ್ನಾಯೊ ಫೋಲಜಾಡೆ ವಿರುದ್ಧ ಸೋತರು. ನೈಜೀರಿಯಾದ ಆಟಗಾರ 7-3ರಿಂದ ಪಂದ್ಯವನ್ನು ಗೆದ್ದರು. ಅನ್ಶು ಕ್ವಾರ್ಟರ್ ಫೈನಲ್ ನಲ್ಲಿ ಆಸ್ಟ್ರೇಲಿಯನ್ ಆಟಗಾರನನ್ನು ಮತ್ತು ಸೆಮಿ ಫೈನಲ್ ನಲ್ಲಿ ಶ್ರೀಲಂಕಾವನ್ನು 10-0 ಅಂತರದಿಂದ ಸೋಲಿಸಿ ಫೈನಲ್ ತಲುಪಿದರು. ಅನ್ಶು ಅವರ ಬೆಳ್ಳಿಯೊಂದಿಗೆ, ಬರ್ಮಿಂಗ್ಹ್ಯಾಮ್ ಕಾಮನ್ವೆಲ್ತ್ ಕ್ರೀಡಾಕೂಟದಲ್ಲಿ ಭಾರತದ ಪದಕಗಳ ಸಂಖ್ಯೆ 23 ಕ್ಕೆ ಏರಿದೆ.