ಅನಿವಾಸಿ ಯುವಕನನ್ನು ಮನೆಗೆ ಕರೆಸಿ, ಅಪಹರಿಸಿ ಕೊಲೆ

ಕೊಲೆಯ ನಂತರ ಶವವನ್ನು ಆಸ್ಪತ್ರೆಗೆ ಸಾಗಿಸಿ ಗ್ಯಾಂಗ್ ಪರಾರಿ..

ಕಾಸರಗೋಡು (ವಿಶ್ವ ಕನ್ನಡಿಗ ನ್ಯೂಸ್) : ಅನಿವಾಸಿ ಭಾರತೀಯ ಯುವಕನೊಬ್ಬನನ್ನು ಆತನ ಹುಟ್ಟೂರಿಗೆ ಕರೆಸಿಕೊಂಡು ಅಪಹರಿಸಿ ಕೊಲೆ ಮಾಡಲಾಗಿದೆ. ಪುತ್ತಿಗೆ ಮುಗೂರು ಗ್ರಾಮದ ಅಬ್ದುಲ್ ರೆಹಮಾನ್ ಎಂಬವರ ಪುತ್ರ ಅಬೂಬಕ್ಕರ್ ಸಿದ್ದೀಕ್ (34) ಮೃತ ದುರ್ದೈವಿ. ಕೊಲೆಯ ನಂತರ, ಶವವನ್ನು ಬಂದ್ಯೋಡಿನ ಖಾಸಗಿ ಆಸ್ಪತ್ರೆಗೆ ಸಾಗಿಸಿ ಗ್ಯಾಂಗ್ ಅಲ್ಲಿಂದ ಪರಾರಿಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಬೂಬಕ್ಕರ್ ಸಿದ್ದೀಕ್ ಸಹೋದರ ಅನ್ವರ್ ಮತ್ತು ಸೋದರ ಸಂಬಂಧಿ ಅನ್ಸಾರ್ ಅವರನ್ನು ಎರಡು ದಿನಗಳ ಹಿಂದೆ ಗ್ಯಾಂಗ್ ಅಪಹರಿಸಿತ್ತು. ಅನ್ವರ್ ಮತ್ತು ಅನ್ಸಾರ್ ಇಬ್ಬರೂ ಗಂಭೀರ ಗಾಯಗಳೊಂದಿಗೆ ಮಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಬಳಿಕ ಮನೆಗೆ ಬಂದ ಸಿದ್ದೀಕ್ ಅವರನ್ನು ಅಪಹರಿಸಿ ಕೊಲೆ ಮಾಡಲಾಗಿದೆ. ಕೊಲೆಯ ನಂತರ, ಶವವನ್ನು ಆಸ್ಪತ್ರೆಗೆ ಕರೆತರಲಾಯಿತು. ಪೈವಲಿಗಾದ ಗ್ಯಾಂಗ್ ಈ ಕೊಲೆಯ ಹಿಂದೆ ಇದೆ ಎಂದು ಸಹ ಕಂಡುಬಂದಿದೆ. ಕೊಲೆಗಾರರನ್ನು ರಯೀಸ್, ನೂರ್ಶಾ ಮತ್ತು ಶಫಿ ಎಂದು ಪೊಲೀಸರು ಗುರುತಿಸಿದ್ದಾರೆ. ಕೊಲೆಯ ಹಿಂದೆ ಹಣಕಾಸಿನ ವ್ಯವಹಾರವಿದೆ ಎಂದು ಸಹ ಕಂಡುಬಂದಿದೆ.