ನವದೆಹಲಿ (www.vknews.in) : ಬಳಕೆದಾರರ ಗೌಪ್ಯತೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ವಾಟ್ಸಾಪ್ ಹೊಸ ಯೂಸರ್ನೇಮ್ (Username) ವೈಶಿಷ್ಟ್ಯವನ್ನು ಪರಿಚಯಿಸಲು ಸಜ್ಜಾಗಿದೆ. ಈ ಫೀಚರ್ ಜಾರಿಯಾದ ಬಳಿಕ, ಹೊಸ ವ್ಯಕ್ತಿಗಳೊಂದಿಗೆ ಚಾಟ್ ಮಾಡಲು ಫೋನ್ ಸಂಖ್ಯೆಯನ್ನು ಹಂಚಿಕೊಳ್ಳುವ ಅಗತ್ಯ ಇರುವುದಿಲ್ಲ.
ಕಂಪನಿಯು ಈಗಾಗಲೇ ಬಳಕೆದಾರರಿಗೆ ತಮ್ಮ ಇಷ್ಟದ ಯೂಸರ್ನೇಮ್ಗಳನ್ನು ಮುಂಚಿತವಾಗಿ ಕಾಯ್ದಿರಿಸಿಕೊಳ್ಳುವ ಅವಕಾಶ ನೀಡಲು ಆರಂಭಿಸಿದೆ. ಈ ವರ್ಷದ ಅಂತ್ಯದೊಳಗೆ ಈ ವೈಶಿಷ್ಟ್ಯವನ್ನು ಅಧಿಕೃತವಾಗಿ ಬಿಡುಗಡೆ ಮಾಡುವ ಸಾಧ್ಯತೆಯಿದೆ.
ವಿಶ್ವದಾದ್ಯಂತ ಮೂರು ಶತಕೋಟಿಗೂ ಹೆಚ್ಚು ಮಂದಿ ವಾಟ್ಸಾಪ್ ಬಳಸುತ್ತಿರುವ ಹಿನ್ನೆಲೆ, ಒಂದೇ ರೀತಿಯ ಹೆಸರುಗಳು ಮರುಕಳಿಸದಂತೆ ವಿಶಿಷ್ಟ (Unique) ಯೂಸರ್ನೇಮ್ ಆಯ್ಕೆ ಮಾಡುವ ವ್ಯವಸ್ಥೆ ಕಲ್ಪಿಸಲಾಗಿದೆ. ಯೂಸರ್ನೇಮ್ ಆಯ್ಕೆ ಮಾಡಲು ವಿಶೇಷ ಯೂಸರ್ನೇಮ್ ಜನರೇಟರ್ ಸಹ ಲಭ್ಯವಿರಲಿದೆ. ಇನ್ಸ್ಟಾಗ್ರಾಂ ಅಥವಾ ಫೇಸ್ಬುಕ್ನಲ್ಲಿರುವ ತಮ್ಮ ಬಳಕೆದಾರ ಹೆಸರನ್ನೇ ವಾಟ್ಸಾಪ್ನಲ್ಲೂ ಬಳಸುವ ಅವಕಾಶವನ್ನು ಸೃಷ್ಟಿಕರ್ತರು, ಸಣ್ಣ ಉದ್ಯಮಗಳು ಹಾಗೂ ಸಂಸ್ಥೆಗಳಿಗೆ ನೀಡಲಾಗಿದೆ.
ಹೊಸ ವೈಶಿಷ್ಟ್ಯದ ಪ್ರಮುಖ ಉದ್ದೇಶ ಬಳಕೆದಾರರ ಗೌಪ್ಯತೆಯನ್ನು ಹೆಚ್ಚಿಸುವುದಾಗಿದೆ. ಮೊದಲ ಬಾರಿಗೆ ಯಾರಿಗಾದರೂ ಸಂದೇಶ ಕಳುಹಿಸುವಾಗ ಅಥವಾ ಸ್ವೀಕರಿಸುವಾಗ ನಿಮ್ಮ ಫೋನ್ ಸಂಖ್ಯೆ ಕಾಣಿಸದೇ, ಯೂಸರ್ನೇಮ್ ಮಾತ್ರ ಗೋಚರಿಸುತ್ತದೆ. ಜೊತೆಗೆ, ಯಾರು ನಿಮ್ಮನ್ನು ಯೂಸರ್ನೇಮ್ ಮೂಲಕ ಸಂಪರ್ಕಿಸಬಹುದು ಎಂಬುದನ್ನು ನಿಯಂತ್ರಿಸುವ ವಿಶೇಷ ಭದ್ರತಾ ಆಯ್ಕೆಯೂ ಲಭ್ಯವಿರಲಿದೆ.
ವಾಟ್ಸಾಪ್ನ ಇತ್ತೀಚಿನ ಆವೃತ್ತಿಯಲ್ಲಿ Settings > Account > Username ವಿಭಾಗಕ್ಕೆ ತೆರಳಿ ಯೂಸರ್ನೇಮ್ ಕಾಯ್ದಿರಿಸಿಕೊಳ್ಳಬಹುದು. ಈ ಫೀಚರ್ ಮುಂದಿನ ಕೆಲವು ತಿಂಗಳಲ್ಲಿ ಹಂತ ಹಂತವಾಗಿ ಎಲ್ಲಾ ದೇಶಗಳ ಬಳಕೆದಾರರಿಗೆ ಲಭ್ಯವಾಗಲಿದೆ.
ವಿಶ್ವ ಕನ್ನಡಿಗ ನ್ಯೂಸ್
Your email address will not be published. Required fields are marked *
Copyright © 2010 ವಿಶ್ವ ಕನ್ನಡಿಗ ನ್ಯೂಸ್. All Rights Reserved.