(www.vknews.in) : ಆಗಸ್ಟ್ 15 ಬಂದಾಗ ಭಾರತೀಯ ಮೈ-ಮನ ಪುಳಕಗೊಳ್ಳುತ್ತದೆ. ಹಿಂದೊಮ್ಮೆ ನಾವು ಪರಕೀಯರ ಆಡಳಿತಕ್ಕೊಳಗಾಗಿದ್ದದ್ದು, ಅಪೂರ್ವ ತ್ಯಾಗ-ಬಲಿದಾನಗಳ ಮೂಲಕ ಸ್ವಾತಂತ್ರ್ಯ ಗಳಿಸಿಕೊಂಡದ್ದು ನೆನಪಾದಾಗ ಹೀಗಾಗುತ್ತದೆ. ದೇಶಾಭಿಮಾನದಿಂದ ನಮ್ಮ ತ್ರಿವರ್ಣ ಧ್ವಜ ಹಾರಿಸುತ್ತೇವೆ. ಸ್ವಾತಂತ್ರ್ಯ ಹೋರಾಟಗಾರರನ್ನು ನೆನಪಿಸಿಕೊಳ್ಳುತ್ತೇವೆ. ದೇಶಕ್ಕಾಗಿ ಜೀವ ಕೊಟ್ಟವರನ್ನು ಗೌರವಿಸುತ್ತೇವೆ. ಆದರೆ ಅದರ ಜೊತೆಗೆ ಅವರು ನಮಗೆ ಬಿಟ್ಟುಹೋದ ಸ್ವಾತಂತ್ರ್ಯ ಎಷ್ಟು ಉಳಿದಿದೆ ಎನ್ನುವುದನ್ನೂ ಒಮ್ಮೆ ಯೋಚಿಸಿದಾಗ ನಿರಾಸೆಯಾಗದೇ ಇರದು.
ಅದನ್ನೆಲ್ಲ ಬರೆಯಲು ಹೋಗುವುದಿಲ್ಲ. ನಮಗೆಲ್ಲರಿಗೂ ಗೊತ್ತಿರುವಂತೆ ಸ್ವಾತಂತ್ರ್ಯವೆಂದರೆ ಬರೀ ಹಿಂದಿನ ನೆನಪಲ್ಲ, ಇಂದಿನ ಧ್ವಜಾರೋಹಣವೂ ಅಲ್ಲ. ಸ್ವಾತಂತ್ರ್ಯವೆಂದರೆ ಆಡಳಿತವನ್ನು ಪ್ರಶ್ನಿಸುವ ಹಕ್ಕು. ಸರ್ಕಾರದ ತಪ್ಪನ್ನು ಸರ್ಕಾರದ ಮುಂದೆ ಹೇಳುವ ಧೈರ್ಯ. ನಮ್ಮದೇ ಪಕ್ಷದವರು ತಪ್ಪು ಮಾಡಿದಾಗ ಅವರನ್ನೂ ಟೀಕಿಸುವ ಅವಕಾಶ. ನಮ್ಮದೇ ಧರ್ಮದ ಹೆಸರಿನಲ್ಲಿ ಅನ್ಯಾಯ ನಡೆದಾಗ ಅದನ್ನೂ ತಪ್ಪು ಎನ್ನುವ ಸ್ವಾತಂತ್ರ್ಯ.
ಈ ಸ್ವಾತಂತ್ರ್ಯ ಬಳಸಿದ ಕಾರಣಕ್ಕೆ ದೇಶದ್ರೋಹಿ, ಧರ್ಮದ್ರೋಹಿ, ಪಕ್ಷವಿರೋಧಿ ಎಂದು ವೈಯಕ್ತಿಕ ದಾಳಿಗೊಳಗಾಗದೇ ಇರುವ ಸ್ವಾತಂತ್ರ್ಯ ನಮ್ಮಲ್ಲೆಷ್ಟಿದೆ? ಹೆಣ್ಣಾಗಿ ಹುಟ್ಟಿದ್ದಕ್ಕಾಗಿಯೇ ಮುಗ್ಧ ಕಂದಮ್ಮಗಳೂ ಕಾಮ ರಾಕ್ಷಸರಿಗೆ ಬಲಿಯಾಗಿ ತಮ್ಮ ಬದುಕಿನ ಸ್ವಾತಂತ್ರ್ಯ ಕಳೆದುಕೊಳ್ಳುವುದೆಲ್ಲ ಬೇಡವೆಂದರೂ ನೆನಪಾಗಿ ಕಣ್ಣು ಹನಿಯಾಗುತ್ತದೆ. ಬದುಕುವ ಸ್ವಾತಂತ್ರ್ಯ ಕಳೆದುಕೊಂಡವರ ಆತ್ಮಗಳು, ಆಡಳಿತವನ್ನು ವಿರೋಧಿಸಿದ ಕಾರಣಕ್ಕೆ ಜೈಲಿನಲ್ಲಿರುವವರು “ಯಾವುದು ಸ್ವಾತಂತ್ರ್ಯ?” ಎಂದು ಕೇಳಿದರೆ ಮೌನವಾಗಬೇಕಾದ ಅಸಹಾಯಕತೆ ನಮ್ಮದಾಗಿದೆ.
ಕ್ರೂರಿಗಳಿಗೆ, ಅತ್ಯಾಚಾರಿಗಳಿಗೆ, ಕೊಲೆಗಡುಕರಿಗೆ ಕಠಿಣ ಕಾನೂನು ಜಾರಿಯಾಗಿ, ಅವರಿಂದ ನಾಗರಿಕ ಸಮಾಜ ಮುಕ್ತವಾಗುವುದೂ ಸ್ವಾತಂತ್ರ್ಯವೇ. ಹೆಣ್ಣುಮಕ್ಕಳು ಭಯವಿಲ್ಲದೆ ಬದುಕುವುದೂ ಸ್ವಾತಂತ್ರ್ಯವೇ. ಹಾಗೆಯೇ, ನಮ್ಮ ಮಾತು ನಮಗೇ ಇಷ್ಟವಾಗಬೇಕು ಎಂಬ ಹಠವಿಲ್ಲದೆ, ಇನ್ನೊಬ್ಬನ ಮಾತಿಗೂ ಕಿವಿಗೊಡುವ ಸಮಾಜವಾಗುವುದೂ ಸ್ವಾತಂತ್ರ್ಯವೇ. ನಮ್ಮನ್ನು ಟೀಕಿಸುವವನ ಮಾತು ಕಹಿಯಾಗಿದ್ದರೂ, ಅದರಲ್ಲಿ ಸತ್ಯವಿದೆಯೇ ಎಂದು ನೋಡುವ ಮನಸ್ಸು ಇರಬೇಕು. ನಮ್ಮ ನಂಬಿಕೆ, ನಮ್ಮ ಪಕ್ಷ, ನಮ್ಮ ಧರ್ಮ—ಇವುಗಳಿಗಿಂತ ಸತ್ಯ ದೊಡ್ಡದು ಎನ್ನುವುದನ್ನು ಒಪ್ಪಿಕೊಳ್ಳುವಷ್ಟು ಸ್ವಾತಂತ್ರ್ಯ ನಮ್ಮೊಳಗಿರಬೇಕು.
ದೇಶಪ್ರೇಮ ಎಂದರೆ ದೇಶದ ಪರವಾಗಿ ನಿಲ್ಲುವುದು ಮಾತ್ರವಲ್ಲ; ದೇಶದಲ್ಲಿ ತಪ್ಪು ನಡೆದಾಗ ಅದರ ವಿರುದ್ಧ ನಿಲ್ಲುವುದೂ ದೇಶಪ್ರೇಮವೇ.
ಇಂದು ನಾವು ಧ್ವಜದ ಕೆಳಗೆ ನಿಂತು ಸ್ವಾತಂತ್ರ್ಯವನ್ನು ಆಚರಿಸುತ್ತೇವೆ. ಆದರೆ ನಾಳೆ ಇದೇ ಧ್ವಜದ ಕೆಳಗೆ ನಿಂತಿರುವ ಮತ್ತೊಬ್ಬನಿಗೂ ನನ್ನಷ್ಟೇ ಮಾತನಾಡುವ ಹಕ್ಕು ಇರಬೇಕು. ಅವನು ನನ್ನ ಧರ್ಮದವನಾಗಿರಲಿ, ಬೇರೆ ಧರ್ಮದವನಾಗಿರಲಿ; ನನ್ನ ಪಕ್ಷದವನಾಗಿರಲಿ, ನನ್ನ ವಿರೋಧಿಯಾಗಿರಲಿ—ಅವನ ಸ್ವಾತಂತ್ರ್ಯವೂ ನನ್ನ ಸ್ವಾತಂತ್ರ್ಯದಷ್ಟೇ ಮುಖ್ಯ.
ನಮ್ಮ ಹಿರಿಯರು ನಮಗೆ ದೇಶವನ್ನು ಮಾತ್ರ ಸ್ವತಂತ್ರಗೊಳಿಸಿ ಹೋಗಿಲ್ಲ. ಮಾತನಾಡುವ, ಪ್ರಶ್ನಿಸುವ, ವಿರೋಧಿಸುವ ಮತ್ತು ತಪ್ಪನ್ನು ತಪ್ಪೆಂದು ಹೇಳುವ ಹಕ್ಕನ್ನೂ ಕೊಟ್ಟು ಹೋಗಿದ್ದಾರೆ. ಅದನ್ನು ಉಳಿಸಿಕೊಳ್ಳುವುದೇ ಅವರಿಗೆ ನಾವು ಸಲ್ಲಿಸಬಹುದಾದ ನಿಜವಾದ ಗೌರವ.
ಸ್ವಾತಂತ್ರ್ಯ ದಿನದ ಹಾರ್ದಿಕ ಶುಭಾಶಯಗಳು..
— ಪಿಎಂ ಇಕ್ಬಾಲ್ ಕೈರಂಗಳ
ವಿಶ್ವ ಕನ್ನಡಿಗ ನ್ಯೂಸ್
Your email address will not be published. Required fields are marked *
Copyright © 2010 ವಿಶ್ವ ಕನ್ನಡಿಗ ನ್ಯೂಸ್. All Rights Reserved.