ತ್ರಿಶೂರ್ (www.vknews.in): ಮಲಯಾಳಂ ಚಿತ್ರರಂಗದ ಖ್ಯಾತ ನಟ ಮಮ್ಮುಟ್ಟಿ ಅವರು ಬಿಜೆಪಿ ನಾಯಕನ ಮನೆಗೆ ಭೇಟಿ ನೀಡಿರುವ ವಿಚಾರ ಕೇರಳದಲ್ಲಿ ಸಾಮಾಜಿಕ ಜಾಲತಾಣದ ಚರ್ಚೆಗೆ ಕಾರಣವಾಗಿದೆ. ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಬಿ. ಗೋಪಾಲಕೃಷ್ಣನ್ ಅವರ ಪುತ್ರಿಯ ವಿವಾಹದ ಬಳಿಕ ಮನೆಗೆ ಭೇಟಿ ನೀಡಿದ ಮಮ್ಮುಟ್ಟಿ ಅವರನ್ನು ಕೆಲವರು ಟೀಕಿಸಿದ್ದು, ಇದಕ್ಕೆ ಬಿಜೆಪಿ ನಾಯಕ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ನವೆಂಬರ್ 1ರಂದು ಗುರುವಾಯೂರಿನಲ್ಲಿ ಗೋಪಾಲಕೃಷ್ಣನ್ ಅವರ ಪುತ್ರಿಯ ವಿವಾಹ ನಡೆದಿತ್ತು. ವಿವಿಧ ರಾಜಕೀಯ ಪಕ್ಷಗಳ ಪ್ರಮುಖ ನಾಯಕರು ಹಾಗೂ ಸಿನಿಮಾ ಕ್ಷೇತ್ರದ ಗಣ್ಯರು ಮದುವೆಯಲ್ಲಿ ಭಾಗವಹಿಸಿದ್ದರು. ಮದುವೆ ಸಮಾರಂಭಕ್ಕೆ ಹಾಜರಾಗಲು ಸಾಧ್ಯವಾಗದ ಮಮ್ಮುಟ್ಟಿ, ಭಾನುವಾರ ಗೋಪಾಲಕೃಷ್ಣನ್ ಅವರ ಮನೆಗೆ ಭೇಟಿ ನೀಡಿ ನವದಂಪತಿಗೆ ಶುಭ ಹಾರೈಸಿದ್ದರು.
ಈ ಭೇಟಿಯ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ನಟನ ವಿರುದ್ಧ ಹಲವು ಟೀಕಾತ್ಮಕ ಪೋಸ್ಟ್ಗಳು ಪ್ರಕಟವಾಗಿದ್ದವು. ಇದನ್ನು ಖಂಡಿಸಿದ ಗೋಪಾಲಕೃಷ್ಣನ್, ಕೇರಳದ ಜನರು ಸಾಮರಸ್ಯದಿಂದ ಬದುಕುವುದನ್ನು ಕೆಲವು ಶಕ್ತಿಗಳು ಸಹಿಸುವುದಿಲ್ಲ ಎಂದು ಆರೋಪಿಸಿದರು.
ಸ್ನೇಹಕ್ಕೆ ರಾಜಕೀಯ, ಧರ್ಮ, ಜಾತಿ, ಭಾಷೆ, ಉಡುಗೆ ಅಥವಾ ಬಣ್ಣದ ಭೇದವಿಲ್ಲ. ಕೇರಳದಲ್ಲಿ ಹಿಂದಿನಿಂದಲೂ ಇಂತಹ ಸ್ನೇಹ ಸಂಬಂಧಗಳು ಅಸ್ತಿತ್ವದಲ್ಲಿವೆ. ಆದರೆ ಇತ್ತೀಚಿನ ದಿನಗಳಲ್ಲಿ ಕೆಲವರು ಈ ಬಾಂಧವ್ಯವನ್ನು ಹಾಳುಮಾಡಲು ಪ್ರಯತ್ನಿಸುತ್ತಿದ್ದಾರೆ. ಇಂತಹ ಸೌಹಾರ್ದಯುತ ನಡೆಗಳನ್ನು ಎಲ್ಲರೂ ಅನುಸರಿಸಬೇಕಾದ ಮಾದರಿಯಾಗಿ ಪರಿಗಣಿಸುತ್ತೇನೆ ಎಂದು ಅವರು ಹೇಳಿದರು.
ವಿವಾಹ ಸಮಾರಂಭಕ್ಕೆ ಮಾಜಿ ಮುಖ್ಯಮಂತ್ರಿ ಹಾಗೂ ಸಿಪಿಐ(ಎಂ) ಹಿರಿಯ ನಾಯಕ ಪಿಣರಾಯಿ ವಿಜಯನ್ ಸೇರಿದಂತೆ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರು ಮತ್ತು ಎಡಪಕ್ಷದ ಹಲವು ನಾಯಕರು ಆಗಮಿಸಿದ್ದರು ಎಂದು ಗೋಪಾಲಕೃಷ್ಣನ್ ತಿಳಿಸಿದರು.
ವಿವಿಧ ಪಕ್ಷಗಳ ರಾಜಕೀಯ ನಾಯಕರು ಪರಸ್ಪರ ವೈಯಕ್ತಿಕ ಸ್ನೇಹವನ್ನು ಉಳಿಸಿಕೊಂಡು, ಕುಟುಂಬದ ಶುಭಕಾರ್ಯಗಳಲ್ಲಿಯೂ ಭಾಗವಹಿಸುವ ಉದಾಹರಣೆಗಳಿವೆ. ಇಂತಹ ಸಂಬಂಧಗಳನ್ನು ಪ್ರೋತ್ಸಾಹಿಸಬೇಕು ಎಂದ ಅವರು, ಮದುವೆಗೆ ಬರಲು ಸಾಧ್ಯವಾಗದಿದ್ದರೂ ಮನೆಗೆ ಬಂದು ನವದಂಪತಿಗೆ ಆಶೀರ್ವದಿಸಿದ ಮಮ್ಮುಟ್ಟಿ ಅವರ ನಡೆಗೆ ಸಂತಸ ವ್ಯಕ್ತಪಡಿಸಿದರು.
ಸಾಮಾಜಿಕ ಜಾಲತಾಣದ ಟೀಕಾಕಾರರು ಪಕ್ಷದ ಕಾರ್ಯಕರ್ತರಲ್ಲ: ಥಾಮಸ್ ಐಸಾಕ್
ಇದೇ ವೇಳೆ ವಿವಾದದಿಂದ ಪಕ್ಷವನ್ನು ದೂರವಿಡಲು ಸಿಪಿಐ(ಎಂ) ಹಿರಿಯ ನಾಯಕ ಥಾಮಸ್ ಐಸಾಕ್ ಪ್ರಯತ್ನಿಸಿದ್ದಾರೆ. ಮಮ್ಮುಟ್ಟಿ ಅವರ ಭೇಟಿಯನ್ನು ಟೀಕಿಸಿದವರು ಪಕ್ಷದ ಅಧಿಕೃತ ಕಾರ್ಯಕರ್ತರಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
“ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿರುವ ಸೈಬರ್ ಅನುಯಾಯಿಗಳೇ ಈ ವಿವಾದದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಅವರು ಸಿಪಿಐ(ಎಂ) ಪಕ್ಷವಲ್ಲ. ಪಕ್ಷಕ್ಕೆ ತನ್ನದೇ ಆದ ಅಧಿಕೃತ ಸಾಮಾಜಿಕ ಜಾಲತಾಣ ಖಾತೆಗಳು, ಅಧಿಕೃತ ನಿಲುವುಗಳು ಮತ್ತು ನಾಯಕರು ಇದ್ದಾರೆ. ಪ್ರಸ್ತುತ ಪರಿಸ್ಥಿತಿಯಲ್ಲಿ ಯಾರಾದರೂ ಪಕ್ಷದ ಪರವಾಗಿ ಮಾತನಾಡುತ್ತಿದ್ದೇವೆ ಎಂದು ಹೇಳಿಕೊಳ್ಳಬಹುದು. ಈ ಬಗ್ಗೆ ಪಕ್ಷದ ಕಾರ್ಯದರ್ಶಿಯೇ ಸ್ಪಷ್ಟನೆ ನೀಡಿದ್ದಾರೆ” ಎಂದು ಐಸಾಕ್ ಹೇಳಿದ್ದಾರೆ.
ಮಮ್ಮುಟ್ಟಿ ಅವರು ಕೇರಳದಲ್ಲಿ ಅತ್ಯಂತ ಗೌರವಾನ್ವಿತ ವ್ಯಕ್ತಿಯಾಗಿದ್ದು, ಎಡಪಕ್ಷಗಳೊಂದಿಗೂ ನಿಕಟ ಸಂಬಂಧ ಹೊಂದಿದ್ದಾರೆ. ಸಿಪಿಐ(ಎಂ) ಅವರೊಂದಿಗಿನ ಇಂತಹ ಸ್ನೇಹ ಸಂಬಂಧವನ್ನು ಮುಂದುವರಿಸಲು ಬಯಸುತ್ತದೆ ಎಂದು ಅವರು ತಿಳಿಸಿದ್ದಾರೆ.
ಪಕ್ಷದೊಂದಿಗೆ ಗುರುತಿಸಿಕೊಂಡಿರುವವರು ಸಾಮಾಜಿಕ ಜಾಲತಾಣದಲ್ಲಾಗಲಿ ಅಥವಾ ಇತರೆಡೆಗಳಲ್ಲಾಗಲಿ ಈ ದೃಷ್ಟಿಕೋನವನ್ನು ಗಮನದಲ್ಲಿಟ್ಟುಕೊಂಡು ವರ್ತಿಸಬೇಕು. ಇದಕ್ಕೆ ವಿರುದ್ಧವಾಗಿ ನಡೆದುಕೊಳ್ಳುವವರು ಪಕ್ಷವನ್ನು ಪ್ರತಿನಿಧಿಸುವುದಿಲ್ಲ ಎಂದು ಥಾಮಸ್ ಐಸಾಕ್ ಹೇಳಿದ್ದಾರೆ.
ವಿಶ್ವ ಕನ್ನಡಿಗ ನ್ಯೂಸ್
Your email address will not be published. Required fields are marked *
Copyright © 2010 ವಿಶ್ವ ಕನ್ನಡಿಗ ನ್ಯೂಸ್. All Rights Reserved.