ಮಳೆಯೆಂದರೆ ಅವಳು (ಕವನ)

ಅವಳು ನೆನಪಾಗುತ್ತಾಳೆ
ಮುಗಿಲು ಮುಟ್ಟಿದ ಮಳೆಗೆ
ತಂಪಾಗಿರುವ ತಂಗಾಳಿಗೆ
ಅವಳೆದೆಯ ಬಿಸಿಯನ್ನು
ಈ ಎದೆಯೂ ಬಯಸುವಾಗ
ಮತ್ತೆ, ಮತ್ತೆ ನೆನಪಾಗುತ್ತಾಳೆ

ಅವಳು ಆಳವಾದ ಶರಧಿ
ನಾನು ಇಳಿಯುವೆನೆಂದೆ
ಅವಳು ಬೇಡವೆಂದಿಲ್ಲ
ನಾನು ಇಳಿದು ಬಿಟ್ಟೆ
ಹತ್ತಿರವು ಆದೆ
ಅದೇ ರಾತ್ರಿ ಜೊತೆಯಾದೆ

ಆ ದಿನದ ಅದ್ಬುತ ನೋಡಿ
ಮಜ್ನೂ ಲೈಲಾಲ
ಖಬರಿನ ಮೇಲೆ ಹೃದಯವಿಟ್ಟು,
ನಾನು ಅವಳ ಎದೆಬಡಿತದ
ಅನುರಾಗ ಆಲಿಸಿ ಮಲಗಿದೆ

ಅನರ್ಘ್ಯವಾದ ಆ ಮಳೆ
ಮನದ ಚಿತ್ತಪಟದಲ್ಲಿ ಮೂಡುತ್ತಿದೆ
ಬಿಟ್ಟು ಹೋಗಬೇಡ ನನ್ನ
ಅವಳೆದೆಯ ಸಂಗೀತದ ಸಾಹಿತ್ಯ
ಕಿವಿಯಲ್ಲಿ ಇಂಪಾಗಿ ಕೇಳಿಸುತ್ತಿದೆ

ಅವಳಿದ್ದ, ಅವಳಿಲ್ಲದ
ಮೊದಲ ಮತ್ತು ಕೊನೆಯ ಮಳೆಯದು
ನಿಮಗೆ ಮಳೆ ಬಂದರೆ
ನನಗೆ ಅವಳು ಬರುತ್ತಾಳೆ
ಮಳೆಯೆಂದರೆ ಅವಳು

– ಆಮಿರ್ ಬನ್ನೂರು