ಭೋಪಾಲ್ (www.vknews.in): ಬಿಜೆಪಿಯ ಧರ್ಮ ಹಿಂದೂತ್ವವೇ ಹೊರತು ಸನಾತನ ಧರ್ಮವಲ್ಲ ಎಂದು ಹಿರಿಯ ಕಾಂಗ್ರೆಸ್ ನಾಯಕ ದಿಗ್ವಿಜಯ್ ಸಿಂಗ್ ಹೇಳಿದ್ದಾರೆ. ‘ಹಿಂದೂತ್ವ ಎಂದರೆ ದ್ವೇಷ ಹರಡುವುದು’ ಎಂಬ ತಮ್ಮ ಹೇಳಿಕೆ ವಿವಾದಕ್ಕೆ ಕಾರಣವಾದ ಬೆನ್ನಲ್ಲೇ ಅವರು ಈ ಸ್ಪಷ್ಟನೆ ನೀಡಿದ್ದಾರೆ.
ಮಧ್ಯಪ್ರದೇಶದ ಭೋಪಾಲ್ನಲ್ಲಿ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ದಿಗ್ವಿಜಯ್ ಸಿಂಗ್, ತಮ್ಮ ಹೇಳಿಕೆ ಹಿಂದೂಗಳ ವಿರುದ್ಧವಾಗಿರಲಿಲ್ಲ; ಬದಲಾಗಿ ಹಿಂದೂತ್ವದ ಪರಿಕಲ್ಪನೆಯನ್ನು ಉದ್ದೇಶಿಸಿ ಮಾಡಿದ್ದಾಗಿತ್ತು ಎಂದು ತಿಳಿಸಿದ್ದಾರೆ.
“ಬಿಜೆಪಿಗೆ ತನ್ನದೇ ಆದ ಹಿಂದೂತ್ವದ ಪರಿಕಲ್ಪನೆ ಇದೆ. ನಾನು ಸನಾತನ ಧರ್ಮದ ಬಗ್ಗೆ ಪ್ರಸ್ತಾಪಿಸಿದ ಬಳಿಕವಷ್ಟೇ ಅವರು ಆ ಪದವನ್ನು ಬಳಸಲು ಆರಂಭಿಸಿದರು. ಅವರ ಧರ್ಮ ಹಿಂದೂತ್ವವೇ ಹೊರತು ಸನಾತನ ಧರ್ಮವಲ್ಲ. ನಾನು ಹಿಂದೂಗಳು ದ್ವೇಷ ಹರಡುತ್ತಾರೆ ಎಂದು ಹೇಳಿಲ್ಲ; ಹಿಂದೂತ್ವ ದ್ವೇಷ ಹರಡುತ್ತದೆ ಎಂದು ಹೇಳಿದ್ದೇನೆ” ಎಂದು ಅವರು ಹೇಳಿದ್ದಾರೆ.
ದಿಗ್ವಿಜಯ್ ಸಿಂಗ್ ಅವರು ಉಜ್ಜಯಿನಿಯಿಂದ ಅಯೋಧ್ಯೆಯವರೆಗೆ ‘ಸನಾತನ ಸ್ವಾಭಿಮಾನ ಯಾತ್ರೆ’ ಕೈಗೊಂಡಿದ್ದಾರೆ. ಈ ಹಿಂದೆ ಸೆಪ್ಟೆಂಬರ್ನಲ್ಲಿ ಫೇಸ್ಬುಕ್ನಲ್ಲಿ ಪ್ರಕಟಿಸಿದ್ದ ಬರಹದಲ್ಲಿ, ಭಗವಾನ್ ಶ್ರೀರಾಮರು ಕೋಟ್ಯಂತರ ಭಕ್ತರ ಪಾಲಿಗೆ ಆಳವಾದ ನಂಬಿಕೆ ಮತ್ತು ಸ್ವಾಭಿಮಾನದ ಸಂಕೇತವಾಗಿದ್ದಾರೆ ಎಂದು ಅವರು ಉಲ್ಲೇಖಿಸಿದ್ದರು.
ಧರ್ಮದ ಹೆಸರಿನಲ್ಲಿ ನಡೆಯುತ್ತಿರುವ ಶೋಷಣೆ ಹಾಗೂ ಭಕ್ತರ ನಂಬಿಕೆಗಳ ಲಘೂಕರಣದ ವಿರುದ್ಧ ಧ್ವನಿ ಎತ್ತುವುದು ಅಗತ್ಯವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದರು.
ಈ ಯಾತ್ರೆಯ ಉದ್ದೇಶ ಯಾವುದೇ ರಾಜಕೀಯ ಪಕ್ಷವನ್ನು ಬೆಂಬಲಿಸುವುದಾಗಲಿ ಅಥವಾ ವಿರೋಧಿಸುವುದಾಗಲಿ ಅಲ್ಲ ಎಂದು ಸ್ಪಷ್ಟಪಡಿಸಿರುವ ಅವರು, ಧರ್ಮದ ಹೆಸರಿನಲ್ಲಿ ಪಾರದರ್ಶಕತೆ, ಸತ್ಯ ಮತ್ತು ಗೌರವವನ್ನು ಎತ್ತಿಹಿಡಿಯುವುದು ಇದರ ಗುರಿ ಎಂದು ತಿಳಿಸಿದ್ದಾರೆ. ಸಾಮಾಜಿಕ ಸಾಮರಸ್ಯ ಮತ್ತು ಸನಾತನ ಮೌಲ್ಯಗಳನ್ನು ಬಲಪಡಿಸುವ ಉದ್ದೇಶವೂ ಯಾತ್ರೆಗಿದೆ ಎಂದು ಹೇಳಿದ್ದಾರೆ.
ನಂಬಿಕೆಯ ಹೆಸರಿನಲ್ಲಿ ನಡೆಯುತ್ತಿರುವ ಶೋಷಣೆಯ ವಿರುದ್ಧದ ಅಭಿಯಾನದಲ್ಲಿ ಸಾರ್ವಜನಿಕರು ಭಾಗವಹಿಸುವಂತೆ ಕರೆ ನೀಡಿರುವ ದಿಗ್ವಿಜಯ್ ಸಿಂಗ್, ಅಭಿಯಾನಕ್ಕೆ ಸೇರಲು ಡಿಜಿಟಲ್ ಲಿಂಕ್ವೊಂದನ್ನೂ ಹಂಚಿಕೊಂಡಿದ್ದಾರೆ.
ರಾಮಮಂದಿರದ ದೇಣಿಗೆ ಹಣದ ದುರುಪಯೋಗದ ಆರೋಪಗಳ ಕುರಿತು ರಾಜಕೀಯ ವಲಯದಲ್ಲಿ ಚರ್ಚೆಗಳು ನಡೆಯುತ್ತಿದ್ದ ಸಂದರ್ಭದಲ್ಲೇ ದಿಗ್ವಿಜಯ್ ಸಿಂಗ್ ಈ ಯಾತ್ರೆ ಆರಂಭಿಸಿದ್ದರು. ಈ ವಿಚಾರವಾಗಿ ಆಡಳಿತಾರೂಢ ಬಿಜೆಪಿಯನ್ನು ಪ್ರತಿಪಕ್ಷಗಳು ಹಲವು ಬಾರಿ ಟೀಕಿಸಿದ್ದವು.
ವಿಶ್ವ ಕನ್ನಡಿಗ ನ್ಯೂಸ್
Your email address will not be published. Required fields are marked *
Copyright © 2010 ವಿಶ್ವ ಕನ್ನಡಿಗ ನ್ಯೂಸ್. All Rights Reserved.